Елорда • 20 Сәуір, 2022

Халықаралық кітап жәрмеңкесі ашылды

102 рет көрсетілді

Аталған руханият жәрмеңкесі Нұр-Сұлтан қаласындағы ЭКСПО Халықаралық көрме орталығында басталды. Халықаралық Түркі академиясының президенті Дархан Қыдырәлі, Түркияның Қазақстан Республикасындағы Төтенше және өкілетті елшісі Уфук Екидже, Қазақстан Жазушылар одағының басқарма төрағасы, ақын Ұлықбек Есдәулет, Қазақстан Республикасы Мәдениет және спорт министрлігі Архив істері және құжаттаманы басқару комитетінің төрағасы Қуат Бораш және Ресей Кітап баспагерлері қауымдастығының президенті Константин Чеченев салтанатты ашылу рәсіміне қатысып, айтулы шараны ашып берді.

Суретті түсірген Ерлан ОМАР, «EQ»

Бұл кітап жәрмеңкесін бас болып ұйымдастырған «Фолиант» баспасы екенін айта кеткен жөн. Аталған іс-шараға бұл баспадан сырт еліміздегі KS Production, Qasym баспа үйі, Qyr Balasy қоғамдық қоры, Steppe&World баспа үйі, «Атамұра» корпорациясы, «Мазмұндама» қоғамдық қоры сияқ­ты баспалардың әртүрлі жанрдағы кітаптары мен Ресейлік А+А баспа орталығы, Alter Ego, «Белый город» сауда үйі қатарлы 20-дан астам бас­па ұйымдары қатысты. Сондай-ақ Түркиялық Damla Publishing баспасы, Иран Ислам Республикасының Қазақстан Республикасындағы Елшілігінің мәдени бөлімі қатарлы алыстан келген кітап бас­па орталықтары да өз өнімдерін көрме аясында оқырманға көрсетті.

Көрмені ұйымдастырушы «Фолиант» баспасы қазақ редакциясының бас редакторы Фарида Рахымжанқызы: «Бұл кітап жәрмеңкесі 2016 жылдан бері өткізіліп келеді. Пандемияға байланысты екі жыл тоқтап қалып еді, биыл міне тағы да ұйымдастырып отырмыз. «Фолиант» бас­пасы кітап нарығында 25 жылдан бері жұмыс істеп келеді. Осы жылдардың ішінде халықаралық кітап жәрмеңкелеріне қатысып жүр. Әлемдік көрмелерге қатысу барысында неге біздің елде осындай кітап көрмесін өткізбеске деген ойдың жетегімен осындай көрмені өткізуді қолға алды. Бұл көрменің мақсаты – осы кітап нарығындағы барлық ұйымдарды, баспа­герлерді, ақын-жазушыларды бір алаңға жинау, шетелдік және қазақстандық баспалардың арасында ынтымақтастық орнату» деген пікірімен бөлісті. Осы көр­ме-жәрмеңке аясында Ұлықбек Есдәу­леттің «Киіз кітабы» мен Ақберен Ел­ге­зектің «Болмаған балалық шақ» кіта­бы авторлардың өз қолтаңбасымен оқырманға сатылды. Сонымен бірге, тарих ғылымдарының докторы, профессор Ерлан Сыдықовтың «Ұлы дала құндылықтары», жазушы Мәди Айым­бетовтің «Бопай ханым» атты рома­нының, «Атамұра» баспасынан шыққан «Балалар поэзиясының антологиясы» секілді кітаптардың таныстырылымы өтті.

Осы көрмеге қатысқан Steppe & World баспа үйінің директоры Раиса Сайран Қадыр: «Қазақ баспа индустриясы дамып, ілгерілеп келе жатқанына қуаныштымын. Жас ұрпақ үшін бұл өте маңызды. Еліміздің жазушыларының кі­таптары және әлем әдебиеті қа­зақ тілінде молымен шыққаны күнделікті нормаға айналуы тиіс. Балалар әлем әдебиетін ана тілінде оқу құқығын талап етуі керек. Осы көрмені ұйымдастыруға ат салысқан әріптес «Фолиант» баспасына алғысымды білдіремін», деді. Аталған кітап көрме-жәрмеңкесі 20-24 сәуір аралығында жалға­сады. Әрине, осындай игілікті іс-шараны ұйымдастырып, бүкіл шығынын өз мойнына алған «Фолиант» баспа үйіне алғыстан басқа айтарымыз жоқ. Кітабымыз көп болсын, кітап оқитындардың қатары сиремесін.

Соңғы жаңалықтар

Доллар қымбаттады

Экономика • Бүгін, 16:15

Күзде ауа райы қандай болады

Ауа райы • Бүгін, 13:33

Ұқсас жаңалықтар