Делегация құрамына Цифрлық даму, инновациялар және аэроғарыш өнеркәсібі министрлігі, «НЗМ» АҚ және IT компаниялардың өкілдері енді. Сондай-ақ Маңғыстау облысынан «Mediana Services Limited» IT компаниясының басшысы, Маңғыстау облысы Өңірлік кеңесінің мүшесі Өмірбек Құрбанбаев қатысты.
Сапар барысында қазақстандық тарап Эстонияның мемлекеттік қызметтер саласында цифрлық кеңістік құру, медицинаның электрондық жүйелері, салық, кедендік әкімшілендіру, білім беру, көлік логистикасы, сондай-ақ технологиялық хабтарды қалыптастыру тәжірибесімен танысты. Қазақстандық қатысушылар мұндай кездесулердің пайдалы екенін атап өтті. Эстония тарапы да болашақта қос ел арасындағы ақпарат алмасуды және байланыстарды өзектендіру үшін осындай іс-шаралардың маңыздылығына назар аударды.
Шара барысында қазақстандық «Mediana Services Limited» IT компаниясы мен Эстонияның «IN Deal OÜ» арасында ынтымақтастық туралы меморандумға қол қою рәсімі өтті. Оған қазақ елі тарапынан компания жетекшісі Өмірбек Құрбанбаев қол қойды. Осылайша қазақстандық IT шешімдер тиісті деңгейде және Еуропа елдеріне экспорттауда үлкен әлеуетке ие болмақ.
«Қол қойылған құжат екі жақты ынтымақтастық жобаларды іске асыруға, біздің компанияның IT өнімдерін Эстонияға және Еуроодақ нарықтарына шығаруға, эстондық бизнес-әріптесіміздің қазақ нарығына келуіне ықпал етеді. Нақты айтатын болсақ, Таллинн қаласында кеңсемізді ашып, екі ІТ-өнімімізді Еуропа нарығына бейімдеп экспортқа шығаруды қолға аламыз. Кәсіпорындарға арналған корпоративтік смарт IoT шешімдеріміз және білім беру саласындағы балабақшаларға арналған интерактивтік-бағдарламалық жобамыз бар. Осы екі жобамен нарыққа қадам бастап жатырмыз», дейді Ө. Құрбанбаев.
Бұл келісім екі елдің елшіліктері мен Астана дипломатиялық клубы бірлесіп Эстонияның цифрлық тәжірибесін зерделеу шеңберінде ұйымдастырған қазақстандық делегацияның 2021 жылғы қарашадағы сапарының жемісі.
