Жоғарыда айтылған өзгерістерге мысалды алыстан іздеп керегі де жоқ. Кеншілер астанасындағы «Мирас» атты жекеменшік клиниканың ашылғанына биыл төрт жылға жуық уақыт болды. Бүгінде бұл медициналық мекеме материалдық-техникалық тұрғыда жарақтандырылу, білікті кадрлармен толықтырылу және сапалы қызмет көрсету жағынан көш бастаушылар қатарында тұр.
Міне, осы жұмыстардың бәрін үйлестіріп отырған білікті де тәжірибелі басшы, Денсаулық сақтау саласының үздігі Роза Сәбитоллақызы Разиева деп сеніммен айтуға болады. Медицина саласының майталман маманы бұл клиниканы қабырғасы қаланғаннан бері басқарып келеді. Ал оған дейін Қарағандыдағы №1 емхананың директоры болып 2004 жылдан бастап 2020 жылға дейін жемісті еңбек етті.
Роза Сәбитоллақызы басқарған жылдары аталған емхана республикадағы топ-5 емдеу мекемелерінің қатарына енді. Ал 2013 жылы №1 емхана облыста алғашқылардың бірі болып медициналық ұйымдардың халықаралық аккредитациясынан өткен болатын.
Жалпы, Роза Разиеваның «Мирас» клиникасының дүниеге келуіне тікелей қатысы бар. «2018 жылы маған жеке кәсіпкер Дәулет Мырзағалиев есімді азамат келіп жолықты, – деп еске алады Роза Сәбитоллақызы. – Ол өзінің медицина саласына инвестиция салғысы келетінін айтып, менен ақыл-кеңес сұрады. Маған бұл идея қатты ұнады. Содан шамам келгенше ол азаматқа өзімнің ой-пікірімді айтып, ақыл-кеңесімді беріп, медицина саласының қыр-сыры туралы білетін бар мағлұматпен бөлістім. Дәулет Мырзағалиев шаруаның ебін білетін кәсіпкер болып шықты. Ол өзінің әріптестерімен бірге аз ғана уақыттың ішінде үш қабатты ғимаратты салып, клиниканы пайдалануға берді».
Айта кету керек, кәсіпкер медициналық нысанды мемлекет-жекеменшік әріптестігі негізінде емес, таза өз қаражатына салды. Ғимарат құрылысы аяқталған соң, клиника іші заманауи медициналық құрал-жабдықтармен жарақтандырылды. Сонан кейінгі мәселе мекемеге басшы тауып, ішін медициналық қызметкерлермен толықтыру болды. Әлбетте, таңдау бірден Роза Разиевадай ұйымдастырушылық қабілеті зор, өз ісінің білгір маманына түскен еді.
«Мирас» клиникасына келерде тәжірибелі басшы құрылтайшыларға бірқатар талап қойды. Медициналық қызметкерлерге арналған әлеуметтік пакет толық сақталмаса, бұл клиникаға бірде-бір маманның келмейтіні айтылды. Осы және бұдан да басқа талап-тілекті құрылтайшылар құп көрген соң, Роза Сәбитоллақызы қызметке кіріскен. Бір қызығы, №1 емхананың ұжымы бастығына бауыр басып кеткен болу керек, түгелдей жаңа нысан – «Мирас» клиникасында жұмыс істеуге тілек білдірді. Бір сөзбен айтқанда, емхана клиникаға тұтастай көшіп келген еді.
Роза Разиеваның бөлімшесі бір жылға жуық уақыт мекемені жалға алып жұмыс істеді. Ал келесі жылы клиника өз алдына жеке шықты. Тіпті ғимарат іші тарлық еткеннен кейін, құрылтайшылар тез арада ғимаратты биіктетіп, тағы бір қабатты салып тастады. Соның нәтижесінде қосымша құрал-жабдықтар қойылып, 26 орындық күндізгі стационар, бірқатар кабинеттер ашуға мүмкіндік туды.
Бұл күнде «Мирас» клиникасы қолжетімді қадамдық емхана қағидатына толықтай сай келетін және сол талапқа жауап беретін медициналық мекемеге айналды. Клиника жұмысын бастаған жылы орын тепкен аумақтағы 12 учаске бойынша 22 мың адамға қызмет көрсетсе, қазіргі уақытта тіркелгендердің саны едәуір көбейген.
Қазіргі таңда «Мирас» клиникасында 190-ға жуық адам жұмыс істейді. Оның ішінде 40 дәрігер, 96 медбике бар. Медициналық мекеменің қарамағында үш жедел жәрдем көлігі, фельдшерлік бригада тұрғындарға уақытпен санаспай қызмет көрсетеді.
Осы орайда, тұрғындарға медициналық сапалы қызмет көрсетіп, олардан тек алғыс алып жүрген мамандарды атай кету артық болмас еді. Клиника директорының орынбасары Айжан Рысбекова, арнаулы медициналық көмек бөлімшесінің меңгерушісі Баян Әубәкірова, бөлімше меңгерушісі – жалпы тәжірибе дәрігері Индира Жанәділова, бас медбибі Роза Арыстанова, хирург Сәуле Ерғалиева, учаскелік дәрігерлер Бақытгүл Досмағамбетова, Феруза Абдулла, Алмагүл Молдабаева, Алтынай Мелдібекова, Ярослав Искра, гинеколог Нұргүл Жазыбекова, аға бухгалтер Перизат Сағындықова, аға бағдарламашы Айдынгүл Бақтыбаева және аға медбике Эльмира Әділова сынды өз ісінің кәсіби мамандары бұл күнде «Мирас» клиникасының мерейін асырып жүр.
Әлеуметтік пакет демекші, құрылтайшылар берген уәдеде тұрып, айтылған тілек-талаптың бәрін де орындады. Тіпті кейбір жағдайларда қызметкерлерге қосымша көмек түрлерін де қарастырды. Мысалы, өзінің міндетіне жауапкершілікпен қарап, жұмысын жақсы істеген қызметкерлерге қосымша ақы төлене бастады. Жас мамандарға да түрлі қамқорлық көрсетіліп тұрады.
– Біздің клиникада қажетті медициналық қызметкерлердің бәрі бар. Жас мамандар да келіп жатады. Дегенмен олардың арасында резидентураға кетіп қалатындары да болады. Сол кездерде кадр тапшылығы сезіліп қалады, – дейді Роза Сәбитоллақызы.
«Мирас» клиникасының құрылтайшылары істің қиюын тапса, медицина саласы мен бизнестің қатар өмір сүріп, бірге дамитынын дәлелдеп берді. Айналдырған екі-үш жылдың ішінде салынған инвестиция жемісін беріп, пайдасын көрсете бастады. Мысалы, табыстың белесіне шыққан кәсіпкерлер Қарағандының іргесіндегі Узенка елді мекенінде сол маңайдағы 16 мыңдай тұрғынға қызмет көрсететін емхана салып, ішін жоғары стандарттарға жауап беретін медициналық құрал, аппараттармен жабдықтап, мамыр айында пайдалануға бермекші.
Қазіргі кезде сарапшылар «Мирас» сынды затының заманауи сипаты сүйсінтетін клиникалардың көп болғаны біздегі медицинаның мерейін өсіріп, абырой-беделін көтере түседі деген пікір айтады. Ол рас, өйткені сапалы және жоғары дәрежедегі медициналық қызметке деген адам баласының сұранысы – күн тәртібінен өмірі түспейтін толғақты тақырыптың бірі.
