Абзал ақынды ардақтады

Сәруәр сәуірде жыр маржаны төгілді. Облыстық С.Сейфуллин атындағы қазақ драма театрында ұлт руханиятына қатысты талай игі бастамаларға мұрындық болып жүрген Қарағанды «Болашақ» маңызды білім беру колледжінің ұйымдастыруымен Қазақстан Жазушылар одағының мүшесі, Халықаралық «Алаш» әдеби сыйлығының иегері, «Ақтоғай ауданының құрметті азаматы», белгілі ақын Абзал Бөкеннің «Тұла бойым көне сөз, көне мүсін» атты шығармашылық кеші өтті. Отыз жылға жуық рухани астанамыз – Алматыда тұрып, ал асқаралы алпысында Арқаға қоныстанған Абзал ақынды оқыр­мандары зор құрметпен қарсы алды. Поэзия кешінде ақын А.Бөкенге жан-жақтан құттықтаулар құ­й­­­ылды. Қазақстан Жазушылар одағы төрағасының бірінші орынбасары Ғ.Жайлыбай бастап бір топ қаламгерлер келді жыр кешіне. Облыс әкімі Бауыржан Әбдішевтің құттықтау хаты оқылды. Облыстық мәслихат хатшысы, өнердің үлкен жанашыры Нұрлан Дулатбеков пен Қазақстан Жазушылар одағы Қарағанды облыстық филиалының директоры, халықаралық «Алаш» әдеби сыйлығының иегері, ақын Серік Ақсұңқарұлы Абзал ақынға ақжарма тілегін арнап, шығармашылық табыс тіледі. «Болашақ» колледжінің директоры, экономика ғылымдарының кандидаты Ғайни Мамраева шығар­машылық иесінің иығына ата-баба жолымен оқалы шапан жапты. Ақынның туып-өскен шалқар бесігі – Ақтоғай ауданынан Қ.Нөкеш, М.Оңғарқұлов бастаған ел ағалары келіп, шайыр шығармашылығы хақында ордалы ой қозғады, Қазақстанның еңбек сіңірген қайраткері, ақынның жерлес інісі Амантай Жұмашев әннен шашу шашты. Жас ұрпақтың санасына нұр­лы шуақ сыйлаған жыр ке­ші Сарыарқаны әсем сазға бө­леді. Жалынды жырларымен оқыр­мандарының жүрегіне елдік пен ерліктің дәнін еккен, қазақ поэ­зиясында айшықты қолтаңбасы бар ақын кеші «Тоқырауын тол­қындары» ансамблінің орындауында кеш иесінің сөзіне жазылған марқұм Д.Сәдуақасовтың «Ақто­ғай – алтын бесігім» әнімен түйінделді. Ілияс ДҮНГЕНБАЙҰЛЫ. Қарағанды.