Айлардың сұлтаны – Рамазандағы Қадір түні қарсаңында Жылыой ауданының мұнайшылары асыраушысынан айырылған отбасыға қайырымдылық көмек көрсетті. Олар аудан орталығы – Құлсары қаласында тұратын көпбалалы ана Нұргүл Ғабдоловаға екі бөлмелі пәтер сатып алып берді. Шындығында бес баласы бар ана мұндай көмекке зәру еді. Оның күйеуі қайтыс болған. Қазір балаларын өзі тәрбиелеп отыр. Балаларының үшеуі – оқушы, екеуі әлі мектепке бармаған. Үлкен қызы туберкулезге қарсы диспансердің есебінде тұр. Бірақ ешкімнің алдына алақан жайып бармаған. Қалталы кәсіпкерлерден көмек сұрамаған. Осы кезге дейін көпбалалы отбасы баспана жалдап келген.
– Жылыой ауданынан «қара алтын» өндіретін «Жылыоймұнайгаз» басқармасының мұнайшылары көпбалалы отбасына көмек көрсету үшін ерікті түрде қаражат жинау бастамасын көтерді. Жиналған қаражатқа Құлсары қаласынан екі бөлмелі пәтер сатып алынды. Өткен жылы мұнайшылардың осындай демеушілігімен Доссор кентінен үш үй, Құлсары қаласынан бір пәтер сатып алынған еді. Мұндай игілікті іс биыл да жалғасын тауып отыр, – дейді «Ембімұнайгаз» АҚ басқарма төрағасының орынбасары Рысты Тасмағамбетова.
Мұнайшылар көпбалалы отбасыға сыйға берілген пәтер орналасқан үйдің дәлізіне жөндеу жүргізді. Ал қоныс той иесіне кілем тарту етті.
