Адам ой-санасының өзгеруі оңай емес. Бұл тағдырлы кезеңнің жауапкершілігі, ашығын айтайық, бұған дейінгі жылдар мен уақытқа қарағанда еш салыстыруға келмейтін деңгейге көтеріле бастады. Ашықтық пен турашылдықты саясатта, экономикалық мәселеде және әлеуметтік, құқықтық салада түбегейлі оң өзгерістер сипатында айту санаға сіңді, үмітті оятып қана қойған жоқ, бұқараның жұмылып, ұйысуына сілкініс әкелді. Ұлттық өзекті мәселелерге қызмет ететін қоғамдық ұйымдардың жұмысын жасандылық атаулыдан арылып, нақты айтуға тура келеді. Даңғаза мадақ, орынды-орынсыз жылтыраққа ыңғай таныта беруге әуестік дағдыдан аулақ болуға шақырамыз. Мұндай көріністер енді ешкімге абырой әпермейді, осы жағдайды мықтап ескеруіміз керек.
Мемлекет басшысының қолға алып отырған саяси реформалары мен бастамалары халықтың көңілінен шығып жатқаны анық. Қарапайым халық бұл ірі өзгерістерді іргелі ел болудың жаңа кезеңі деп түсініп, қоғамды тазарту арқылы дамыту қадамдарын қуаттау үстінде. Әрбір отбасы мен ұжым мүшелерінің әділеттілік қағидасын жан-жақты қолдауы және әрбір отандастарымыз өзі өмір сүріп отырған еркін елдің азаматы ретінде үн қатуы ерекше маңызды. Бұл қажет десе, кешегі замандарда тарыдай шашылған тарихымызды түгендеуге қаншалықты күш салып келсек, енді қазақ жұртының келешегі, ғаламдық жағдайдың сын-қатеріне қарсы тұра білу үшін қарманудың нағыз қаhармандық танытар, мемлекеттік негіздер мен саяси жүйені түбегейлі түзейтін күн туғаны анық.
Біз Президенттің Конституцияға енгізілетін өзгерістер мен толықтыруларды референдумға ұсынып, халықтың еркін таңдауына беруін осы тұрғыдан қолдаймыз. Бұл көптің тілегімен құп алынып, қабылданатын Ата Заңымыздың қазіргі қолданыстағы нұсқасының 33 бабына өзгеріс енгізілетіні және олар қандай өзекті, түйінді мәселелер екендігін есепке алсақ, еліміздің саяси жүйесінде түбегейлі бетбұрыс болатынын анық аңғартады.
Мемлекеттік басқарудың жаңа моделіне көшуі, ауқымды өзгерістердің мағыналы, тағдыршешті тұстары осындай ойға жетелейді. Әлі күнге дейін ұлттық құндылықтарды байыта түсу барысында «Қазаққа қандай идея, қандай мәдениет, қандай экономика керек?» деген өміршең сауалдарға жауапты жанталаса іздеуді бастан өткеріп келе жатқанымыз рас. Бұл күндері ой ерікті, сөз ерікті, болашаққа болжам да ерікті болуға тиіс. Ал мұндай қоғамдық ой-сана сілкінісі елдік сенімнен нәр алса, елдің алғысы мен терең түсіністігі одан әрі көркейеді.
Сол елдік зор сенім күн өткен сайын жақсылық тілеумен және таза пейілмен арта түсуде. Бұл құбылыстарды айналамыздан байқамау, не сезінбеу мүмкін емес. Қазіргі ел басшылығының көп жыл бойы қоғамға реніш туғызған ойсыздықтарды түбірімен жойып, көрер көзге заңды белден басқан озбырларды қатаң тәртіпке шақырып жатқаны, заң үстемдігін ашық орнықтыру іс-әрекеттері оң көзқарастарды қалыптастыруда. Оның темірқазығы – шындық, ойлылық пен дәлдік, бүгінгі күн мен келешектің қамын сабақтастыра зерделеу, өзіңді-өзің сыйлау және өзгеге сыйлата білу.
Халықтан өткен асылың жоқ. Ендігі жерде еліміздің әр перзенті қалың қауымның жоғын жоқтайтын, саяси биікке көтерілетін деңгейге жетуге тиіс. Әр азаматтың ұлттық мүддені басшылыққа алуын міндеттеуді жүктеу де бекерден-бекер күн тәртібіне қойылып отырған жоқ.
Бұл референдум саяси мәні жағынан бүкіл құзыретті бір адамға қаратып негіздейтін жолдан тартынып, керісінше мемлекетті басқару ісіне азаматтық қоғамды тікелей қатыстырып, әділетті Қазақстан құруға бағытталған. Туған ел-жұртымыздың өмір сүру сапасын өркениетті, нақты іспен жақсартуды мұрат етеді. Сол иманды да ибалы халқымыз ірілігін танытып, көшелі, көргенді екенін паш етуге жұмылады. Біз осы бедерлі уақытта тек ақиқатқа жүгінуге жол аштық. Бұл – адамдардың күткен өмірінің басты өлшемі. Әйтпесе, жылдар бойы әлеуметтік әділдікке қол жеткізе алмаған түрлі жағдайлар қатты алаңдатып, жұрт наразылығын тудырған жоқ па еді?!
Еліміз бойынша билік пен қоғам арасындағы қарым-қатынастағы шынайы өзгерістердің бұқаралық сипатқа ие бола бастауының түпкі мәні осында жатыр. Сол себепті тәуелсіз мемлекетіміздің жаңа өркенді, жаңа тарихи белесін батылдықпен құнттап жатқан ірі саяси бастамалардың жүзеге асып, құтты болуын қалаймыз.
Мейрамбек ТӨЛЕПБЕРГЕН,
Мәжіліс депутаты