Бұл тарихи құжат мемлекетіміздің саяси жүйесінің түбегейлі жаңарып, жаңғырып, оның қарапайым халық үшін ашықтылығын, сонымен қатар бұқара алдындағы есептілігін арттыруға даңғыл жол ашады. Жолдау еліміздің бұдан былайғы даму стратегиясы мен болашақтағы бағдарын анықтап, «Жаңа Қазақстанның» қазіргі сипатын, сондай-ақ келешектегі кемел бағытын айқындап берді.
Жолдауды талқылауға арналған жиында аудан әкімі М.Сағымбек аудан ақсақалдары, әйелдер кеңесі, жастар қауымы, этномәдени бірлестіктер, үкіметтік емес ұйымдар, тағы басқа да қоғамдық мекемелер өкілдерінің, сонымен бірге жергілікті атқарушы орган қызметкерлерінің алдында тұрған мақсат-міндеттерге тоқталды. Социалистік Еңбек Ері К.Айтжанова, аудандық мәслихат хатшысы Е.Шоқпаров, Amanat партиясы аудандық филиалының атқарушы хатшысы Қ.Досмаилов, аудандық қоғамдық келісім кеңесі төрағасының орынбасары С.Солтанқұлов, аудандық аналар кеңесінің төрайымы К.Бердіғұлова, аудандық ұйғыр этномәдени бірлестігінің мүшесі Қ.Ашимова және осы тәрізді ел-жұрттың арасында беделі биік тұлғалар да тұрғындармен тікелей бетпе-бет кездесулер мен әлеуметтік желілерде Жолдау жайлы лебіздерін ортаға салды. Қарапайым көпшілік те олардың оң ой-пікірлерін қолдайтындықтарын білдірді.
Жалпы, ауданда Мемлекет басшысының халыққа арнаған Жолдауын тұрғындар арасында түсіндіру бойынша 14 ақпараттық-насихаттық топ құрылып, оларға аудан әкімінің орынбасарларынан бастап, бөлім басшыларына дейінгі лауазымды тұлғалар жетекшілік етеді. Бұл топтардың аудан орталығы – Жаркент қаласында, сонымен қатар ауылдық округтердегі барлық елді мекендерді аралап жүргізетін жұмыс кестесі бекітілген. Топ мүшелері қазіргі күндері жұртшылық арасында өз жұмыстарын барынша жандандырып жүр.
Марат ИЛИПОВ,
Панфилов аудандық ішкі саясат, мәдениет, тілдерді дамыту және спорт бөлімінің басшысы
