Жалынды жастық шағы ел басына қатер төнген қилы кезеңмен тұспа-тұс келген Хамит қария талай тарихтың көзі тірі куәгері.
Бейнетпен белдесе жүріп буыны бекіген оның тағдырына қилы күндердің шежіресін, уақыт үнін қалам-қуатымен бүгінге жеткізу бұйырған. Елуінші жылдары ел газетінде жемісті еңбек еткен ардагер сол сұрапыл жылдар туралы: «Таңатпай тұрып табанымыздан сыз өтіп жүріп, соқамен жер жырттық, талай бейнет пен қиындық көрдік», деп еске алады. Осыны алға тартқан «Егемен» басшысы қазыналы қарияны мерекесімен құттықтап, жеңісті жақындатуға қосқан үлесі кейінгілер үшін өлмес өнеге екенін, басылым ұжымы еңбектегі ерлігіне құрметпен қарайтынын айтып, отбасына амандық тіледі.
Еңбегі елге мұра, ұрпаққа ұран болған майдангерлермен теңестіріліп, ел дамуына екпін беретін сан салада қажырлы еңбек еткен Хамит ақсақал күні бүгінге дейін қоғамдық жұмысқа белсене араласып келді. Өз кәсібіне адал азамат бас басылымның Қостанайдағы тілшісі болған уақытында, өңір өміріндегі өзекті жайларды қаз-қалпында баяндап, талай тағдырға араша түсті. Сонымен бірге астықты аймақтағы тың бастамалар, ел мерейін тасытқан жағымды жаңалықтар ізденімпаз тілшінің қаламынан тыс қалған жоқ. Қарымды қаламгер баспасөздегі мақалаларымен шектеліп қалмай, аударма ісімен де айналысты.
Алматы қалалық ардагерлер кеңесінің төралқа мүшесі ретінде қоғамдық жұмыстан әлі де қол үзбеген Хамит Біржанұлы ұлт баспасөзінің жанашыры. Тоқсанның төріндегі ардагер мемлекеттің қоғамдық-саяси өміріндегі жаңа бетбұрыстарды баспасөз арқылы танып-біліп отыратынын айтып, «Егемен Қазақстан» газетінің басшысына ризашылығын білдірді.
АЛМАТЫ
