Спорт • 09 Мамыр, 2022

«Бопайдың» бағы жанбады

365 рет
көрсетілді
1 мин
оқу үшін

Өткен аптада әлемнің әр қиырында аралас жекпе-жектен бірқатар турнир өтті. Қазақ жанкүйерлерінің назары АҚШ-тың Арлингтон мен Ресейдің Екатеринбург қалаларындағы жарыс­тарға ауды.  

«Бопайдың» бағы жанбады

Мұхиттың арғы бетінде жалауы желбі­реген PFL турнирінде 29 жастағы Зәм­загүл Файзолланова өзінің тұсаукесер кездесуін өткізді. Кезінде еліміздің танымал дзю­дошыларының бірі болған Шығыс Қазақстан облысының тумасы 2015 жылдан бері аралас жекпе-жекпен шұғылдануда. «Бопай» деген бүркеншік есіммен танылған қазақ қызы сол аралықта сегіз кездесу өткізіп, тек біреуінде ғана ұтылған еді. Бұл жолы Зәмзагүлдің жолы болмады. Ол 27 жастағы Ларисса Паченкомен күш сынасты. Бразилия өкілінің осы спорт түрін серік еткелі 10 жылдан асты. Сол кезден бері ол 20 рет октагонға шығып, 16 мәрте жеңіс тойын тойлады. Өкінішке қарай, Арлингтонда өткен бәсеке ұзаққа созылмады. Паченко бірінші раундта-ақ Файзолланованы ауыр соққылардың астына алып, айқын жеңіске қол жеткізді.

Екатеринбургтегі RCC 11 турнирінде Ілияс Хамзин Виктор Фигейредомен ай­қасты. Ресейдің Омбы облысында туып-өскен қандасымыз қарсыласын бір минутқа жеткізбей ұрып жықты. Осылайша, Ілияс қатарынан төртінші жарыста Бразилиядан келген спортшыларды сан соқтырды.