Өнер байқауына еліміздің әр түкпірінде түсірілген қырық шақты қысқаметражды фильм келіп түсті. Шағын туындылардың көпшілігі отбасылық құндылық, ата-ана алдындағы перзенттік парыз, баспанасын құмар ойынға тігіп отбасын далада қалдырған, өзі қашып-пысып жүрген жауапсыз әкенің берекесіз тірлігі сияқты әлеуметтік жүгі ауыр мәселелерді көтерген. Сонымен қатар баскетбол спортына ерекше қызығушылық танытқан інісінің мықты спортшы болып қалыптасуына көп күш жұмсап, ерекше жігер танытқан бауырмал ағаның жанашырлығы сияқты тәрбиелік тағылымы мол жылы дүниелер де бар.
Көлемі қысқа болғанымен, мазмұны терең, шымыр оқиғаларға құрылған шағын фильмдердің көркемдік деңгейі мен түсірілім тобының режиссерлік, операторлық шеберлігін С.Қожамқұлов атындағы Жезқазған қазақ музыкалық-драмалық театрының директоры, театр және кино актері – Сәкен Досхан бастаған қазылар алқасы таразылады. Нәтижесінде, «Үздік оператор» аталымы бойынша шырайлы Шымкент шаһарынан келген Фархат Саипов жеңімпаз атанса, «Үздік режиссер» аталы-
мына қостанайлық Есбол Жатқанов лайық деп танылды. Нұр-Сұлтан қаласынан келген Жарқын Тілеуқор «Ең үздік сценарийі» аталымына ие болса, алматылық Рүстем Дастанұлының «Минус 5» деп аталатын 7 минуттық қысқаметражды туындысы байқаудың ең беделді аталымы «Үздік фильм» атағын жеңіп алды.
Ұйымдастырушылардың айтуынша, фестивальдың басты мақсаты – Серке Қожамқұлов, Елубай Өмірзақов, Қапан Бадыров, Әнуар Боранбаев сынды өнер тарландары дүниеге келген өңірде қазақ кино өнерін дәріптеп, жаңа есімдердің танылуына ықпал ету.
Тобыл төрінде тұңғыш рет ұйымдастырылып отырған шараға кәсіби сахна өнері мен ұлттық киноның қалыптасып, дамуына өлшеусіз үлес қосқан сан қырлы актердің туған қызы Мәриям Сералықызы Алматыдан арнайы келіп қатысты. Даңқты әкесінің туған жері Қарабалыққа барып қайтқан Мәриям апай Қостанай жұртшылығына алғысын айтып, ізгі тілегін арнады.
– Қарабалық ауданында әкем атындағы музыка мектебі мен бір көше бар екен. Аталған мектептің оқушыларымен кездесіп, дәріс оқыдым. Ал сонау Алматыдан менімен бірге келген М.Әуезов атындағы Қазақ мемлекеттік академиялық драма театры музейінің жетекшісі Нарғыз Тамабекқызы аудандық музей қызметкерлеріне шеберлік сабағын өткізді. Бүгін екі той қатарласып отыр. Біріншіден, әкемнің туған күні болса, екіншіден Жезқазған театрына әкемнің атының берілгеніне тура 40 жыл болыпты. Сіздерге алғысым шексіз, – деді толқи сөйлеген Мариям Сералықызы.
Ауқымды іс-шара барысында І.Омаров атындағы Қостанай облыстық қазақ драма театрында белгілі кино және театр актрисасы Алтынай Нөгербек «Психофизикалық әрекет» атты шеберлік сағатын өткізді.
Қостанай облысы
