Алаяқтар азаймай тұр

Ақтөбеде алаяқтардың жолы болып тұр. Құқық қорғау органдары тарапынан қаншама қарекет жасалғанымен де алаяқтар алдағандар қатары көбейіп кетті. Облыстық ішкі істер департаменті баспасөз қызметінің өзі де мойындағандай, алаяқтардың, соңғы кездері бағы жанған сыңайлы. Мысалы, үстіміздегі жылғы 27 наурызда кезекші бөлімге бірден үш зардап шегушіден алаяқтың құрығына іліккені туралы хабар түскен. Үш зардап шегуші де Мәртөк селосының тұрғындары. Олардың сеніміне кірген бейтаныс әйел «Қазавтожол» ЖШС-іне жұмысқа орналастырамын деп алдап, жалпы сомасы 102 500 теңгені үптеп кеткен. Үш дерек бойынша да Ақтөбе қаласының 27 жасар тұрғыны күдікті болып отыр. Тап сол күні 19 сағат 25 минутта кезекші бөлімге Ембі қаласының 26 жасар тұрғыны түскі сағат 13.00 сағатта белгісіз біреудің телефон шалып, оның автомобиль ұтқанын, сыйлықты алу үшін 5 мың бірлік салу қажеттігін хабарлағанын, өзінің терминал арқылы көрсетілген бірлікті аударғанын жеткізеді. Оңай олжа табамын деп алданып қалғанын кеш түсінген. Сол күні қаланың 33 жастағы тұрғынынан да шағым түскен. Сөйтсе, одан бұрын онша жақсы таныс емес жігіт 2012 жылы Кірпішті ауданынан жер телімін алып беремін деп алдап, 2 мың АҚШ долларын алған. Бұдан бір күн бұрын кезекші бөлімге 47 жастағы әйел адам жо­­­лыққан. Қала тұрғыны 2013 жылы мамыр айында өзіне онша таныс емес 55 жастағы әйел адамның «Тойота Каролла» автомашинасын сатып алып беремін деп алдап, 1210 мың теңгесін қағып кеткен. Адалдықтың ауылынан алшақ­таған алаяқтар тым әккіленіп алғаны соншалық, алдап-арбаудың түрлі-түрлі тәсілдерін шебер пайдаланады. Адамдардың сеніміне тез кіруге дағдыланған. Әрине, бұған өзіміз де кінәліміз. Қазір олардың алдауына көзі ашық жастардың да өзі арбалып қалуда. «Бұл не деген батпан құйрық, айдалада жатқан құйрық» деп бас қатырып жатпаймыз. Сатыбалды СӘУІРБАЙ, «Егемен Қазақстан». Ақтөбе облысы.