Қоғам • 13 Мамыр, 2022

Қазақстан-Түркия арасындағы әуе рейстерінің саны екі есе артады

16 рет көрсетілді

Қазақстан мен Түркия арасындағы әуе рейстерінің саны 13 мамырдан бастап 124-ке дейін екі есеге артады. Бұл туралы Анкарада өткен Президенттер Қасым-Жомарт Тоқаев пен Режеп Ердоғанның кездесуі барысында Индустрия және инфрақұрылымдық даму министрі Қайырбек Өскенбаев мәлімдеді, деп хабарлайды Egemen.kz ҚР ИИДМ баспасөз қызметіне сілтеме жасап.

Бүгінде әуе қатынастары бойынша үкіметаралық келісім негізінде елдер арасындағы тұрақты рейстердің жиілігі бойынша аптасына 61 жолаушылар рейсі орындалады. Енді 13 мамырдан бастап ұшу саны аптасына 63 рейске артпақ. Сәйкесінше елдер арасындағы апта сайынғы рейс саны 124-ке дейін өседі.

«Биыл 13 мамырдан бастап Анталия және Бодрум бағыттарында қатынайтын Air Astana, SCAT, Turkish Airlines әуекомпанияларының рейс саны біртіндеп артады. Қосымша рейстер Нұр-Сұлтан, Алматы, Ақтау, Ақтөбе, Атырау, Қарағанды, Қостанай, Орал, Шымкент және Өскемен арқылы іске асырылады», деді Қайырбек Өскенбаев.

SCAT Анталияға аптасына 29 жаңа рейсті Нұр-Сұлтан (аптасына 7 рейс), Алматы (6), Ақтөбе (3), Атырау (3), Шымкент (2), Қарағанды (2), Орал (2), Қостанай (2), Ақтау (1), Өскемен (1) қалаларынан жүзеге асырады. Ал Air Astana Нұр-Сұлтан және Алматыдан Анталия (7 рейстен) мен Бодрумға (2 рейстен) аптасына 18 рейс жасамақ. 

Turkish Airlines Анталияға аптасына 16 рейсті Нұр-Сұлтан (5 рейстен), Алматы (4) және Қарағандыдан (3) және Бодрумға Нұр-Сұлтан (2 рейстен) мен Алматыдан (2) орындайды.

Қайырбек Өскенбаевтың айтуынша, 2022 жылғы мамырда Индустрия және инфрақұрылымдық даму министрлігі мемлекеттер арасындағы әуе тасымалын одан әрмен арттыру мен ұшу географиясын кеңейту бойынша екі елдің әуе билігі өкілдерінің келіссөз жүргізуі ұсынған. Бастама қолдау тауып, келіссөздер осы жылдың шілдесінде Ыстанбұл қаласында өтеді.

Аяна Тоғанбек

Соңғы жаңалықтар

Ұқсас жаңалықтар