Депутаттар өңірдегі транспорт әлеуетін дамыту бойынша екі ел арасындағы бірлескен іс-қимылдар барысын талқылады. Сондай-ақ басқосуға ИИДМ Автомобиль жолдары комитетінің төрағасы Төлеген Абдуллин де қатысты.
Қазақ-қырғыз шекарасында 8 өткізу бекеті бар. Оларды 2025 жылға дейін қайта жаңғырту көзделіп отыр. Кездесу барысында депутаттар «Қордай» және «Қарасу» өткізу бекеттеріне барды.
Айта кетсек, «Қордай» бекетін реконструкциялау жұмыстары өткен жылдың наурызында аяқталған болатын.
Жаңартылған пункт жаңа құралдармен, оның ішінде «Рапискан» инспекциялық-тексеру кешенімен жабдықталған. Автокөліктерге арналған қозғалыс жолағының саны 4-тен 8-ге дейін артты. Сонымен қатар өткізу бекетіндегі паспорттық бақылау кабинасының саны 34-ке көбейді. Бұған дейін олардың саны 13 болатын.
Реконструкциялық жұмыстардан кейін бекеттің өткізу қабілеті 4 есеге яғни, 6 мыңнан 25 мың адамға дейін артқан. Ал көліктер ағыны 2 жарым есеге ұлғайған. Бекеттің жаңғыртылуы елдер арасындағы сауда-экономикалық ынтымақтастықты арттыруда мультипликативтік әсерін тигізбек.
Сондай-ақ жаңарту жұмыстары алдағы уақытта «Қарасу» және «Бесағаш» шекаралық бекеттерінде де жүргізілмек. Өзге 5 пунктті модернизациялау жұмыстары кезең-кезеңімен іске асырылмақ.
Аймаққа сапар барысында депутаттар «Қарасу» және «Ак-Тилек» өткізу бекеттері арасындағы көпір құрылысының барысымен де танысты. Нысан құрылысы 2019 жылғы жаңа көпір салу және қолданыстағы көпірді реконструкциялау бойынша бірлескен іс-қимыл туралы Үкіметаралық келісім негізінде жүзеге асуда.
Көпірдің жобалық-сметалық құжаттамасы 2020 жылы әзірленіп, құрылыс-монтаждау жұмыстары 2021 жылы басталды. Көпір биылғы жылдың аяғына дейін пайдалануға беріледі.
Кездесу нәтижесі бойынша Қазақстан мен Қырғызстан өкілдері автокөлік жолдары саласында ынтымақтастықты одан әрмен арттыру туралы өзара келісімдерге қол қойды. Тараптар өздеріне жүктелген міндеттемелерді уақтылы әрі сапалы жүзеге асыруға уағдаласты.
