Тиімді келісімдер жасалған кездесу

Қазақстан Сыртқы істер ми­нистрі Ерлан Ыдырысов пен Ұлы­британия Сыртқы істер министрінің бірінші орынбасары баронесса Сайида Варси екі­жақты қарым-қатынастың әрі қа­рай даму болашағын, сонымен қа­тар, бірқатар халықаралық өзек­ті мәселелерді талқыға салды. Әңгімелесуші тараптар екі­жақ­ты қатынастың белсенді даму ерекшелігін атай отырып, оған 2013 жылғы шілде айында Ұлы­британия Премьер-министрі Дэ­вид Кэмеронның Қазақстанға жа­са­ған сапары мен сол айда Қазақ­стан Президенті Нұрсұлтан Назар­баевтың Лондонда британдық үкі­мет басшысымен өткізген кезде­су­лері елеулі қарқын бергенін атап көрсетті. Е.Ыдырысов пен баронесса Варси сауда-экономикалық, ғы­лы­ми-техникалық және мәдени ын­ты­мақтастық жөніндегі Үкімет­аралық комиссияның жұмысының маңыздылығын атап өтті. Оған арнайы жұмыс топтары мен Қазақстан-Британия сауда-өнеркәсіп кеңесі кіреді. Сауда-экономикалық қа­рым-қатынас екі елдің екіжақты ықпалдастық кешенінің негізі болып табылады. Қазақстан Кеден комитетінің мәліметтеріне сәйкес, 2013 жылы екі ел арасындағы тауар айналымы 2,1 млрд. АҚШ долларын құраған (экспорт – 1,5 млрд., импорт – 0,6 млрд.). Ұлыбритания – Қазақстан экономикасына инвестиция салудан үшінші ел (Нидерланд пен АҚШ-тан кейін). Қазақстан Ұлттық банкінің мәліметтерінше, Қазақстан экономикасына құйылған тікелей британдық инвестиция көлемі 2005 жыл мен 2013 жылдың қыркүйек айы аралығында 10 млрд. АҚШ долларын құраған. Үкіметаралық комиссия ая­сындағы келесі кездесулер мамыр айында Астана экономикалық форумы шеңберінде Астанада және қазан айында дәстүрлі Қазақстан бизнес-форумы шеңберінде Лондонда өтеді деп күтілуде. Ал СІМ-де өткен келіссөздер барысында тараптар Д.Кэмеронның Астанаға сапары кезінде уағ­да­ла­сылғанындай визалық режім­ді әрі қарай жетілдіру мен қазақ­стан­дықтар үшін британдық виза­ны алу процедурасын жеңілдету мә­селелерін талқыға салды. Сондай-ақ, Е.Ыдырысов пен баронесса Варси Қазақстан мен Ұлыбританияның құқықтық салалардағы ынтымақ­тастығының болашағын қарас­тырды. Сонымен қатар, кездесуде Қа­з­ақ­станның 2017-2018 жылдары БҰҰ Қау­іпсіздік Кеңесіне тұрақты емес мүшелікке сайлануға жасап жат­қан қадамдары туралы сөз болды. Халықаралық күн тәртібіне тоқтала келе, Е.Ыдырысов пен баронесса Варси Украинадағы жағдайды, Иран ядролық бағдарламасын, сондай-ақ, президенттік сайлау мен халықаралық коалицияның негізгі әскери күштерін 2014 жылдың соңына дейін өз аумағынан шығару үдерісі аясындағы Ауғанстандағы мәселелерге қатысты пікір алмасты. Келіссөздер нәтижесінде Ау­ған­станнан британдық әскерлерді тиімді алып шығуды қамтамасыз ету және аса маңызды Ұлыбританияның жүктерін Қазақстан аумағы арқылы тасымалдау үшін қажетті екіжақты құжаттарға қол қойылды.