Референдум-2022 • 16 Мамыр, 2022

Жаңа бетбұрыстың бастауы

504 рет
көрсетілді
4 мин
оқу үшін

Референдумды қоғамдық қолдау жөніндегі Атырау өңірлік штабының жетекшісі Гүлзада Шакуликованың айтуынша, Конституцияға енгізілетін өзгерістер мен толықтырулар саяси реформаларды жеделдетеді. Өйткені тәуелсіздік алғаннан бері әлемдік өркениетте өз орнын айшықтаған мемлекетімізді одан әрі демократиялық жолмен өркендету үшін бұрынғы құқықтық жүйені заман талабына сай жаңартудың маңызы зор.

Жаңа бетбұрыстың бастауы

– Ата Заң – азаттығымыздың басты құндылығы. Тәуелсіздік жылдарында еліміздің қоғамдық-саяси дамуында өзгерістер бол­ғанын жоққа шығармаймыз. Елімізде бірнеше жаңа кәсіпорын, бірнеше жаңа оқу орны ашылды. Сондай оқу орнының қатарында С.Өтебаев атындағы Атырау мұнай және газ университеті де бар. Қазір мұнда отандық, шет-елдік мұнай-газ өнеркәсібіне қа­жетті мамандар даярланады. Әр салада жұмыс істейтіндердің қа­тарында тәуелсіз Қазақстанда дү­ниеге келген жастардың шоғыры көбейді. Жоғары оқу орындарында сондай жастардың легі білім алып жатыр. Олар студенттік бас­қармалар, волонтерлік қызмет, басқа да маңызды іс-шаралар арқылы еліміздің дамуына атса­лысып, зор жауапкершілік жүгін сезініп отыр. Отаншыл жас­тардың ынтасынан елімізді жаңа жеңістерге жетелегісі келетінін аңғаруға болады, – дейді Гүлзада Шакуликова.

Өңірлік штаб жетекшісі Президенттің кейбір өкілеттігін Парламентке, Үкіметке және жер­гілікті атқарушы органдарға беру бастамасына қолдау білді­ріп отыр. Оның пікірінше, бұл қоғамға өзін өзі басқару арқылы өз тағдырына жауапкершілік алуға мүмкіндік бермек.

– Бұл – бүгінгі қоғамның әр мүшесі ел үшін маңызды қадам. Мәселен, депутаттар бел­сен­ділігі арта түседі. Ал білім беру ме­ке­мелері сту­дент­тердің өзін өзі басқару дағды­ларын дамытуға, сындарлы дебаттар мен студенттік басқа­ру арқылы жаңаша ойлауды қалып­тастыруға көңіл бөлуі керек. Мұндай өзгерістерді жатсын­баған жөн. Мемлекет басшысының суперпрезидент­тік басқару моделінен Парла­мент пен мәслихаттардың рөлі күшейген саяси жүйеге көшу, демократиялық процестер қарқынын үдету, елдегі бірлік пен ынтымақты арттыру бастамасы қолдауға лайық. Міне, сол себептен баршамыздың алдымызда жаңа және әділетті Қазақстан құру жолында азаматтардың мүддесі мен құқығын қорғау, сая­си жүйені, әкімшілік-аумақтық құрылымды өзгерту, жаңа экономиканы қалыптастыру секілді бірқатар маңызды міндет тұр. Осы орайда саяси жаңғыру бағы­тындағы бастамаларға қол­дау көрсету – елдігіміздің белгісі, – дейді Г.Шакуликова.

Атырау облысының қоғамдық ұйымдары мен жұртшылығы ел Конституциясына өзгерістер мен толықтырулар енгізілуіне байланысты өтетін референдумның маңызына қызығушылық танытып отыр. Мәселен, қоғам бел­сен­дісі Арман Хайруллин жетек­ші­лік ететін «Атамекен ЭКО» қо­ғам­дық бірлестігіндегі бас­қосу­да эко­­белсенділер, депутаттар мен жо­ғары оқу орындарының оқытушы­лары пікір алмасты.

– Біз ашық мемлекетті қалып­тас­тырудың алғышартына куә болып отырмыз. Мемлекет пен қоғам арасында жаңа байланыс, қарым-қатынас орнай бас­тады. Әлеуметтік желі­дегі пікір­лерден отандастары­мыз­ды тол­ғандыратын мәсе­ле­­лер­ді жиі оқимыз. Оның ішінде Конс­титуцияға енгізіл­гелі отыр­ған өзгерістер де бар. Сол себеп­тен, алда өтетін рефе­рен­дум­ға қазақ­стан­дық­тардың қызығу­шы­лығы артады, – дейді облыстық мәсли­хаттың депутаты Серік Қадыров.

С.Өтебаев атындағы Атырау мұнай және газ университетінің до­центі Болат Нығметовтің ай­туын­­ша, Конституцияға өз­геріс­­тер енгізілгеннен кейін Қазақ­­­стан­ның экономикалық-сая­си дамуында жаңа бетбұрыс бас­та­­лады. «Жаңа мемлекеттік мо­дель­ге, мемлекет пен бұқара ара­­­сын­­дағы өзара іс-қимыл­дың жаңа са­тысына қадам басқалы отыр­­мыз. Бұл – жаңа бетбұ­рыс­тың бас­­тауы», деп есептейді Б.Нығметов.

Референдумның маңызы Қазақ­­стан халқы Ассамблея­сы­ның облыстық филиалында да тал­қыланды. Филиал төраға­сы Нұр­жан Ермұхановтың пікірін­ше, Мемлекет басшысы саяси ре­фор­­малардың бірне­ше паке­тін ұсынып отыр. «Күн сайын жаңа­рып жатқан қоғам жаңа шешімдер мен өзгерістерді қажет етеді. Біз қазақстандықтардың баршасы қоғамның жаңарғанын, саяси өзгерістер болғанын күтетінін кө­ріп отырмыз. Өйткені бұл ха­лық­тың референдумға деген қызығу­шы­лығының жоғары болуынан байқалады. Сондықтан рефе­рен­думның маңызды екенін ұғынуға тиіспіз», дейді Н.Ермұханов.

 

Атырау облысы

Соңғы жаңалықтар

Су үнемдейтін қондырғы

Технология • Кеше