Қазақстан • 17 Мамыр, 2022

Ауыл мектептеріне 515 жаңа автобус беріледі

513 рет
көрсетілді
2 мин
оқу үшін

Балалар жылы аясында еліміздің ауыл мектептерінің автобус паркі 515 автобуспен жаңартылады, деп хабарлайды Egemen.kz Білім және ғылым министрлігінің баспасөз қызметіне сілтеме жасап.

Ауыл мектептеріне 515 жаңа автобус беріледі

Бұл балаларды мектепке және үйлеріне қауіпсіз тасымалдауды қамтамасыз етуге мүмкіндік береді. Әсіресе мектептері жоқ шалғайдағы халқы аз ауылдарда тұратын балалар автобуспен  қамтамасыз етіледі.

«Балаларды автобуспен қамтамасыз ету үшін қаржыландыру әкімдіктерге бөлінеді. Білім және ғылым министрлігі мектеп автобустарымен қамтамасыз ету мәселесін бірнеше рет көтерген болатын. Биыл өңірлер мектептерін балаларды тасымалдауға арналған жаңа көліктермен қамтамасыз ету мәселесі республикалық деңгейде шешіліп, жаңа автобустар алуға қаржы бөлініп жатыр. Сондай-ақ білім беру ұйымдарын автобустармен одан әрі жабдықтау үшін Жол картасы әзірленді. Бүгінгі таңда 25 мыңнан астам оқушы көлікке мұқтаж. Сондай-ақ мектеп автобустарына жоғары қажеттілік Түркістан, Ақмола, Батыс Қазақстан, Алматы, Павлодар және басқа да облыстарда байқалады», деді БҒМ Балалардың құқықтарын қорғау комитеті төрағасының орынбасары Дулат Жекебаев.

Қазіргі уақытта барлығы 1000-нан астам мектеп автобусы қатынайды. Қаржылық лизинг бағдарламасы бойынша жеңілдетілген шарттармен елімізде құрастырылған жаңа автобустар сатып алынады. Бұл тетік ел мектептерінің барлық автобус паркін кезең-кезеңімен жаңартуға мүмкіндік береді.

«Балаларды тасымалдауда барынша қауіпсіздікті қамтамасыз ету мақсатында біз сатып алынатын көліктерге қойылатын техникалық талаптарды әзірлеп, белгіледік. Бұл 20-40 жергілікті автобус болуы керек, себебі ауылдарда көбіне жол жоқ. Онымен қоса, көліктер қауіпсіздік белдіктері бар балалар орындықтарымен, салонда балаларды қалдыруды болдырмайтын жүйемен, кабинаның артқы жағындағы авариялық шығумен жабдықталуы керек. Сонымен қатар балаларды мектеп автобусымен тасымалдау кезінде мектеп директорының бұйрығымен бекітілген арнайы қызметкер алып жүруі қажет», деп түсіндірді Дулат Жекебаев.