Экономика • 18 Мамыр, 2022

Алтын сатып алудың маңызы

102 рет көрсетілді

Қазіргі геосаяси түсініксіздік және қор нарығындағы құбылмалылық жағдайында, сонымен қатар валюта курсының күн сайын өзгеруіне орай инвестициялаудың балама құралдарына деген сұраныс жедел өсіп жатыр. Бұл ретте ең сенімді альтернативті құрал ретінде алтын аталады.

Әлемде де, Қазақстанда да алтынға деген сұраныстың қатты өскені байқалады. 2022 жылдың наурыз айының өзінде ел тұрғындары жалпы салмағы 167,2 кило болатын 8,3 мың алтын құймасын сатып алған. 2021 жылмен салыстырғанда сатылған алтын құймаларының саны 2,9 есе, салмағы 3,5 есе өскен. Жалпы, былтыр салмағы 1,1 тонна болатын 32,3 мың өлшеулі құйма сатып алынған. Өлшеулі құйма нарығы еліміздің бүкіл өңірін қамтиды, негізінен Алматы, Нұр-Сұлтан және Атырауда көбірек сатылды. Алтын құймаларының 5, 10, 20, 50 және 100 грамдағы бес түрі ұсынылған. Сатып алушылар арасында әсіресе 10 грамдық алтын ерекше сұранысқа ие. 2017-2021 жылдар аралығында сатылған алтын арасында 10 грамдық алтынның үлесі 27 пайызды (23,4 мың) құрайды. Еске салайық, Ұлттық банк 2017 жылдан бері халыққа сертификатталған тазартылған алтын құймаларын сатуды бас­тады. Сатудың басты мақсаты – қаржы жинау үшін қазақстандықтарға қосымша инвестициялық құрал ұсыну.

Қай заманда да алтын – құны жойыл­майтын, салмағы жеңілдемейтін стра­тегиялық актив болып саналады. Егер инвестицияны алтынмен жасар болсаңыз, жинағыңызды инфляциядан қорғап қана қоймай, капиталыңызды еселеп арттыра да аласыз. Мәселен, 2016 жылдан 2022 жылға дейін алтын бағасы 76,4 пайызға қымбаттаған. Осының өзі-ақ алтынның инвестициялаудағы теңдессіз актив боларын көрсетеді. Жалпы алғанда, алтын жоғары өтімділікке ие, ол сізді инфляция мен эконо­микалық дағдарыстардан қорғайды.

Ұлттық банк шығаратын әрбір алтын құймасы қорғаныс элементтерімен (айна беті, микротекст және бедерлі жиек) жа­рақ­талған. Құйма қандай да бір меха­­ни­­калық залалдан сақтайтындай, қорап­­шаның ашылған-ашылмағанын жедел тексере алатындай қылып арнайы қорап­шада шығарылады. Сондай-ақ қорға­ныс қорапшасы құйма сапасының сертификаты болып есептеледі.

Қазіргі кезде алтын құймаларын Halyk Bank, «Еуразиялық банк», Jusan Bank және «Банк ЦентрКредит» бөлімшелерінен, сонымен бірге жекелеген банктік емес айырбастау бекеттерінен сатып алып, қайта сатуға болады.

Ұлттық банктің тазартылған құймалар және инвестициялық монеттер нарығын дамыту бойынша Аустралияның Перт қаласындағы теңге сарайының тәжірибесіне сүйене отырып, цифрлы активтерді енгізуі мүмкін. Теңге сарайы InfiniGold компаниясының көмегімен өзінің қоймасын алтынды сақтау, қауіпсіздік және комиссиялық шығындарсыз сатып алғысы келетін қарапайым инвесторға «виртуалды бейнеде» ұсынады. Аустралия үкіметінің кепілдігіндегі сары металды кез келген уақытта кез келген жерде отырып-ақ 0,02 доллар минималды сомасына сатып алуға мүмкіндік бар. Бізде де осындай тәжірибе енгізілсе, онда пайдаланушылар онлайн-платформада Ұлттық банктің инвестициялық құралдарын сатып алған­дығы туралы сертификатты сатып алады және сата алады. Бұл ретте нақты инвестициялық құралдар Ұлттық банктің кепілдігімен арнайы қоймада сақталады.

Соңғы жаңалықтар

Коронавирус жұқтырғандар көбейді

Коронавирус • Бүгін, 10:29

Газеттер «сөйлеген» күн

Қазақстан • Бүгін, 08:34

Түркияда бақ сынайды

Спорт • Бүгін, 08:33

Әбиба қола алды

Спорт • Бүгін, 08:32

«Уимблдон» додасы басталды

Спорт • Бүгін, 08:30

Байтұрсыновқа арналған байқау

Ахмет Байтұрсынұлы • Бүгін, 08:22

Мемлекетті айыптап отыр

Әлем • Бүгін, 08:17

Сал-серінің соңы

Қазақстан • Кеше

Ұқсас жаңалықтар