Жуырда облыс әкімі Әбілқайыр Сқақов Canarax Trading LLP компаниясының құрылтайшылары Нитинг Бхатнагар және Ибраһим Ахмет Абдолла әл Хаммадимен кездесті. Ә.Сқақов Мемлекет басшысы Қасым-Жомарт Тоқаевтың инвестициялық жобаларды іске асыруды үдету туралы тапсырмасына сәйкес өңірлік маңызы бар индустриялық аймақты құру бойынша жұмыстар атқарылып жатқанын атап өтті.
– Бұл біздің бірінші кездесу емес. Өткен жылдың наурыз айында Абу-Дабиде біздің өкілдеріміз өзара ынтымақтастық туралы меморандумға қол қойған еді. Бұдан кейін Екібастұз қаласында өңірлік индустриялық аймақ құрылды. Шағын индустриялық аймақтың жетекші инвесторы ретінде «Canarax Trading» компаниясы шақырылып отыр. Екібастұз қаласының кешенді даму жоспарын бекіту кезінде көмір химиясын дамытуға басымдық бердік. Біз үшін көмір – Екібастұздың басты ресурсы және шикізат базасы, – деді Ә.Сқақов.
Бұл ретте инвесторларға көмір химиясын дамыту бойынша көмір күлін қалдықсыз қайта өңдеу технологиясының, шайынды суларды тазалау үшін ардсорбенттер әзірлеудің дайын патенттері бар химия және көмір институтымен әріптестік байланыс құру ұсынылды.
Компанияның құрылтайшысы Нитин Бхатнагар пандемия кезеңінде Қазақстанмен байланыс орнату қиынға соққанын, қазір бірлескен жобаларды жүзеге асыруға мүмкіндік мол екенін айтты. «Біз индустриялық аймақты жүзеге асыру бойынша жұмыс жүргізіп, әлеуетті инвесторлармен кездестік. Екібастұздағы шағын индустриялық аймақтың табысты жұмыс істеуін міндетімізге аламыз», деді ол.
Қазірдің өзінде инвесторлар Екібастұз қаласында және «Астана» халықаралық қаржы орталығында «Canarax Ekibastuz Industrial Zone» ЖШС-ін тіркеп үлгерген. Кейін индустриялық аймақтың басқарушы компаниясы ретінде жұмысын жалғастыратын болады.
Павлодар облысы
