Швейцария құрамасы алғашқы екі турда Италия (5:2) мен Дания (6:0) құрамаларын ірі есеппен қапы қалдырғаннан кейін шайбалы хоккей мамандары үшінші тур алдында олар Қазақстанды да қалпақпен ұрып алады деп болжам жасаған еді. Алайда әр тур сайын ойыны қалыптасып келе жатқан қазақстандық хоккейшілер бұл жолы «А» тобының турнир кестесінде екінші орында тұрған швейцариялықтарға лайықты қарсылық көрсетті. Тіпті алғашқы 20 минутта жерлестеріміз Швейцариямен тең түсіп, қарсыластардың шайба соғуына мүмкіндік бермеді. Патрик Фишер шәкірттері алғашқы екі турдың бірінші кезеңінде-ақ Италия қақпасына – бір, Данияға үш шайба соққанымен, бұл жолы Шутов қақпасынан саңылау таба алмай, әбден пұшайман болды.
Алайда екінші кезеңді өте белсенді бастаған швейцариялық хоккейшілер кездесудің 24-минутында есеп ашты. Голдың авторы – Денис Мальгин. Қазақстандық хоккейшілерде осы кезеңнің өзінде-ақ таразы басын теңестіретін керемет мүмкіндіктер болғанымен, соңғы сәтте жиі мүлт кетіп жатты. Есесіне кезеңнің соңына таман Дарио Симион есепті еселеп кетті – 2:0. Екінші айналымда соғылған екінші шайба қорғаушы Самат Даниярдың қателігінен кейін Андрей Шутов қорғаған қақпа торынан табылды.
Үшінші кезеңнің 46-минутында біздің құрама мұзайдында бір ойыншы кем ойнаса да, есеп айырмасын қысқартуға мүмкіндік алды. Кезекті қарсы шабуыл кезінде қорғаушы Джесси Блэкер шайбаны өз аймағынан қарсыластың аймағына дейін апарып, орта қашықтықтан қақпаға бағыттаған шайбасының алдында швейцариялық қорғаушылар да, қақпашы да дәрменсіз қалды – 2:1. Бірақ арада көп өтпей Швейцария құрамасы есеп айырмасын қайта ұлғайтты – 3:1. Матчтың 56-минутында Даниэль Герцог өз командасының басымдығын арттырғанымен, ойынның аяқталуына екі минут қалғанда қазақстандық қорғаушы Валерий Орехов құраманың екінші шайбасын соқты. Таразы басын теңестіру үшін Юрий Михайлис ойынның соңғы минуттарында қақпашының орнына алтыншы ойыншыны шығарғанымен, онысы бәрібір нәтиже бермеді.
Қазақстан құрамасы бұл ойында жеңілсе де, алдыңғы екі матчпен салыстырғанда тәуір ойын көрсетті. Қақпашы Андрей Шутовтың да кешегі ойында жасаған ерлігін ерекше атап өткен жөн. Ол 60 минутта қарсыластың 40 соққысын қайтара білді. Ал бұл ойында Қазақстан құрамасының ең үздік ойыншысы деп қорғаушы Валерий Орехов танылды. Оған марапатты осы ойынды тамашалауға барған Мәдениет және спорт министрі Дәурен Абаев тапсырды.
Матч аяқталған соң Қазақстан ұлттық құрамасының бас бапкері Юрий Михайлис былай деді: «Бүгін екі құрама да жақсы ойын көрсетті. Жігіттер мұзайдынға көтеріңкі көңіл күймен жеңіске жетеміз деген құлшыныспен шықты. Оны өздеріңіз де байқадыңыздар деп ойлаймын. Барлық хоккейші ойынның әр сәтінде жеңіске жету үшін барын салды. Бізде шайба соғып, таразы басын өзімізге қарай аударатын жақсы мүмкіндіктер болды. Бірақ шабуылдың нүктесін қоятын ойыншы табылмай жатты. Ал біздің қақпаға голдың бәрі өз қателігіміздің салдарынан соғылды. Десе де жігіттер еңсесін түсірмей, соңғы минутқа дейін барын салды».
Топтағы өзге ойындарға тоқтасақ, Канада Словакияны жеңсе (5:1), Дания хоккейшілері италиялықтардан бір шайба айырмашылығымен басым түсті (2:1). Германия құрамасы да Францияны 3:2 есебімен ұтты. «А» тобының турнир кестесінде Швейцария мен Канада құрамалары 9 ұпаймен көш бастап тұр. Қазақстан құрамасы келесі кездесуін бүгін дәл осы Үйеңкі жапырақтары елінің командасымен өткізеді. Матч елорда уақытымен 23:20-да басталады.
«В» тобының турнир кестесінде де екі құрама көш бастап келеді. Швеция үшінші турда Ұлыбританияны 6:0 есебімен жеңсе, Финляндия АҚШ-тан айласын асырды (4:1). Бұл құрамаларда 9 ұпайдан бар. Аустрия буллит сериясында Чехиядан (2:1), Латвия Норвегиядан басым түсіп (3:2), чемпионаттағы алғашқы жеңістеріне қол жеткізді.
