Футбол • 20 Мамыр, 2022

Ұлттар лигасы: Адиев кеңейтілген құрамды жариялады

16 рет көрсетілді

Санаулы күндерден кейін футболдан УЕФА Ұлттар лигасының 2022/23 жылғы жаңа маусымы басталады. Биыл үшінші мәрте ұйымдастырылып жатқан доп додасының жалауы маусым айын­да желбірейді. Аталған турнирде Қазақ­стан ұлттық құрамасы «С» дивизионының 3-тобында Слова­кия, Әзербайжан және Беларусь құрамаларымен ойнайды.

Қазақстан футбол федерациясы баспасөз қызметінің мәліметі бойынша, 2022 жыл­ғы футбол күнтізбесінің ерекшелігіне бай­ланыс­ты біздің құрама маусым айын­­да төрт матч өткізеді – екеуі өз елімізде, екеуі сырт алаң­­да. Жерлестеріміз Ұлттар ли­га­­­­сындағы алғашқы ойынын 3 мау­­сым күні Нұр-Сұлтанда Әзер­бай­жан құрамасымен өткі­зеді. «Ас­тана Аренадағы» матч елор­да уақы­тымен 20:00-де басталады.

Араға үш күн салып Қазақ­стан құрамасы екінші тур ойынын өткізу үшін Словакияға сапар шегеді. Кездесу Трнава қаласындағы «Антон Малатинский» стадионында Нұр-Сұлтан уақытымен 6 маусымнан 7 маусымға қараған түні сағат 00:45-ке жоспарланған.

Ал 10 маусымда қазақстан­дықтар Беларусь футболшыларымен шеберлік байқасады. Алайда матч УЕФА Атқару комитетінің шешімі бойынша, бейтарап аумақта, яғни Сербияның Нови-Сад қаласын­дағы «Караджорже» стадионында өтеді. Өкінішке қарай, стадионнан ойынды тама­шалауға жанкүйерлерге тыйым салынған. Үшінші турдың матчы Нұр-Сұлтан уақытымен 10 маусымнан 11 маусымға қараған түні сағат 00:45-те өтеді.

Қазақстан құрамасы маусым айына жоспарланған төрт ойын­ның соңғысын 13 маусымда Словакиямен үйде өткізеді. Матч елорда уақытымен 20:00-де «Астана Аренада» басталады. Айта кетейік, Ұлттар лигасының топтық кезеңінің қорытынды ойын­дары күзде болмақ. 22 қыр­күйекте Қазақстан құрамасы Бела­русь құрамасын қабылдайды, ал үш күннен кейін біздің команда сырт алаңда Әзербайжанмен ойнайды.

Бірер күн бұрын Қазақстан ұлттық құрамасының жаңадан тағайындалған бас бапкері Ма­гомед Адиев Ұлттар лигасы осы ойындарға шақыртылған ойын­шылардың кеңейтілген тізімін жариялады. Магомед Адиев  бас бапкер ретінде алғашқы жиынға мына футболшыларды шақырды. Олар: Қақпашылар – Игорь Шацкий («Шахтер»), Мұхаммеджан Сей­сен («Тараз»), Бекхан Шайзада («Ор­дабасы»), Стас Покатилов («Ақтөбе»);

Қорғаушылар – Сергей Малый, Александр Марочкин, Бағдат Қайыров (барлығы – «Тобыл»), Юрий Логвиненко, Темірлан Ерланов (екеуі де – «Ақтөбе»), Марат Быстров («Ахмат», Ресей), Нұралы Әліп («Зенит», Ресей), Елдос Ахметов («Тараз»), Михаил Габышев («Шахтер»), Талғат Көсепов («Астана»);

Жартылай қорғаушылар – Асхат Тағыберген, Владислав Васильев, Самат Жарынбетов (барлығы – «Тобыл»), Аслан Дарабаев, Исламбек Қуат (екеуі де – «Астана»), Думан Нәрзілдаев («Каспий»), Тимур Досмағамбетов («Шахтер»), Ян Вороговский («Моленбек», Бельгия), Ғафуржан Сүйімбаев («Ақсу»), Эльхан Астанов («Ордабасы»), Бауыржан Байтана («Тараз»), Рамазан Оразов, Максим Самородов, Ар­ман Кеңесов (барлығы – «Ақтөбе»);

Шабуылшылар – Артур Шу­шеначев («Қайрат»), Абат Айым­бетов («Астана»), Айбар Жақ­сылықов («Тобыл»), Абы­лайхан Жұмабек («Тараз»).

Сонымен қатар Қазақстан ұлт­тық құрамасының бапкерлер құрамы да белгілі болды. Бас бапкер Магомед Адиевке қа­зақстандық жас мамандар Евгений Коструб пен Руслан Бал­тиев және ресейлік Арслан Ха­лимбеков көмектеседі. Ал бұ­ған дейін «Шахтердің» қақпа­шы­ларын баптаған Валерий Си­та­ло енді ұлттық құраманың қақпа­шыларына жауапты болады.

Бұған дейінгі оқу-жаттығу жиын­дарына шақырылған футбол­шылардың денін «Астана» мен «Қайрат» клубтарының ойыншылары құрайтын. Ал Адиев қазір «Тобыл» мен «Ақтөбе» ойыншыларына арқа сүйейтінін аңғартты. Мәселен, бұл жиын­ға «Тобылдың» – жеті, «Ақтө­бенің» алты футболшысы шақы­рыл­ды. 11 турдан кейін ел бірін­шілігінде көш бастап тұрған «Та­раз» бен екінші орындағы «Аста­надан» төрт ойыншыдан бар. «Ордабасыдан» – екі, «Қайрат» пен «Каспийден» бір-бір футболшыдан шақырылып отыр.                

Соңғы жаңалықтар

Алматыда троллейбус өртенді

Оқиға • 24 Маусым, 2022

ТүркПА-ның атауы өзгереді

Парламент • 24 Маусым, 2022

Ұқсас жаңалықтар