Биылғы ұлттық кубоктың топтық кезеңіне Қазақстан Премьер-лигасында өнер көрсететін 14 клуб пен Бірінші және Екінші лига арасында өткізілген алдын ала іріктеу кезеңінде үздік шыққан Қызылорданың «Қайсары» мен Талдықорғанның «Жетісу» командалары да қатысатын болды. Осылайша, 16 команда төрт-төрттен төрт топқа бөлініп, ең үздік екі клуб жарыстың ширек финалына жолдама алады. Жеребе тарту рәсіміне Қазақстан ұлттық құрамасының бас бапкері Магомед Адиев және ҚКФЛ спорттық директоры Павел Демян қатысты. Жеребе қорытындысы бойынша, топтар былайша құрылды:
«А» тобы: «Ақсу», «Атырау», «Қайрат», «Ордабасы»;
«В» тобы: «Қайсар», «Ақжайық», «Каспий», «Қызыл-Жар СК»;
«С» тобы: «Ақтөбе», «Мақтаарал», «Тараз», «Тобыл»;
«D» тобы: «Шахтер», «Тұран», «Жетісу», «Астана».
Топтық кезеңнің алғашқы тур ойындары шілденің 8-і мен 10-ы аралығына, соңғы, алтыншы тур 13-14 тамызға жоспарланған. «Тобыл», «Астана», «Қайрат» және «Қызылжар» клубтары Еурокубок бәсекелерінің іріктеу кезеңінде өнер көрсететіндіктен, Қазақстан OLIMPBET-Кубогы күнтізбесіне өзгерістер енуі мүмкін.
