Хоккей • 23 Мамыр, 2022

Жеңілістен көз ашпай тұр

13 рет көрсетілді

Финляндияда басталған шайбалы хоккейден элиталы дивизионның әлем чемпионатында өнер көрсетіп жатқан Қазақстан құрамасы қатарынан бесінші турда жеңілді. Жерлестеріміз топтық кезеңнің алғашқы бәсекелерінде Дания (1:9), Франция (1:2) және Швейцария (2:3) құрамаларына жол берсе, кейінгі екі турда да Канада мен Словакия хоккейшілерінен ұтылып, тағы да ұпайсыз қалды. Ал бұл кезеңде Италия және Ұлыбритания құрамалары чемпионаттағы алғашқы ұпайларына қол жеткізді.

Қазақстандық хоккейшілер төртінші турда шайбалы хок­кейден әлем чемпионаты тарихында 27 мәрте бас жүл­дені жеңіп алған Канада құра­ма­­сымен кездесті. Олар былтыр Латвия астанасы – Ригада ұйым­дастырылған жа­һандық додада топ жарған болатын. Сол чемпионатта да екі ел­дің хоккейшілері бір топта өнер көр­сетіп, канадалықтар 4:2 есе­бімен жеңіске жеткен-ді. Биылғы матчта да Канада құрамасының мерейі үстем болды – 6:3.

Кездесудің алғашқы кезе­ңінде қазақстандық хоккейшілер қарсыластардың атағынан еш қаймықпай, жеңіс үшін барын салды. Тіпті матч барысында Юрий Михайлис шәкірттері екі рет есепте алға шығып алғанын айта кеткен жөн. Алдымен ойын­ның үшінші минутында Егор Петухов Әлихан Әсетовтің та­маша пасынан кейін есепті ашты. Алайда арада бір минуттан сәл аса уақыт өткенде канадалықтар Дилан Козенстің соққан шайбасы арқылы тара­зы басын теңестіріп кетті. Кейіннен канадалық хоккей­шілер ойын тәртібін жиі бұза бастады. Сан басымдығына ие болған Қазақ­стан құрамасы 13-минутта қайтадан есепте алға шықты. Бұл жолы Аркадий Шестаков мергендігімен көзге түсті. Бір­ақ арада көп уақыт өтпей Ка­нада хоккейшілері тағы да есепті теңестіріп кетті. Андрей Шутов қайтарған шай­баға бірінші жеткен Дрейк Ба­терсон командасының екінші шайбасын соқты. Бірінші кезеңнің аяқталуына екі минут қалғанда бұл жолы қарсылас команда ойын­шылары сан басымдығына ие болып, кездесуде алғаш рет есепте алға шықты. Шайбаның авторы – Адам Лаури. Осылайша, алғашқы кезеңде Канада камбэк жасады.

Екінші кезеңнің бел ортасынан ауғанда канадалық Дэймон Сиверсон Андрей Шу­товпен бірге-бір шығып, қақпа­шымыздан оп-оңай айласын асырды. Ал үшінші кезеңнің 47-минутында Кирилл Савицкий мергендік танытып, есеп айырмасын қысқартуға мүмкіндік алған-ды. Алайда матчтың со­ңына дейін Дилан Козенс тағы екі шайба соғып, ойынның нүк­тесін қойды.

Араға бір күн салып Қазақ­стан құрамасы бесінші турда Словакия хоккейшілерімен мұзайдында шеберлік байқасты. Дәл осы турда Қазақстан құра­масының ұпай алатын тамаша мүмкіндігі бар еді. Себебі Сло­вакия алғашқы турда Францияны (4:2) жеңгенімен, кейінгі үш турда Германия (1:2), Канада (1:5) және Швейцариядан (3:5) жеңілген-ді. Яғни құрамалардың күштері тең еді.

Соған қарамастан кездесудің есебін бірінші болып Словакия ойыншылары ашты. Бірінші кезеңнің 13-минутында Әлихан Әсетовтің қателігінен кейін шай­баға иелік еткен Самуэль Такач­тан тез арада қақпа ма­ңайында тұрған әріптесі Андрей Колларге пас шығарды. Коллар өз кезегінде Андрей Шутов қорғаған қақпаны дәл көздеп, аттасын қапы қалдырды. Алайда словакиялық жанкүйерлердің қуанышы ұзаққа созылмады. 15-минутта Юрий Михайлис шәкірттері сан басымдығын жүзеге асырып, таразы басын теңестірді – 1:1. Джесси Блей­­кердің көк сызықтың б­о­йынан қақпаға жасаған жой­қын соққысын Словакия құра­масының қақпашысы қайтар­ғанымен, кейін серпілген шай­баға Кирилл Панюков бірінші жетті. Арада екі минут өткенде жерлестеріміз тағы да сан ба­сымдығына ие болып, бұл жолы да мүмкіндікті мүлт жіберген жоқ. Бұл шайба да дәл алғашқы голдың сценарийімен соғылды. Роман Старченконың сол қап­талдан жасаған соққысын қақ­пашы қайтарғанымен, оң қап­талдан шабуылдаған Дмитрий Шевченконың соққысына тойтарыс бере алмады – 2:1.

Алайда екінші кезеңнің орта тұсына келгенде Павел Акользин ойын ережесін бұзғаны үшін төреші тарапынан бес минут айып­пен жазаланып, әріптестерін қиын жағдайға қалдырды. Салдарынан ойынның 30-минутында Мартин Фегервары таразы басын теңестірсе, 34-минутта Адаму Лишку командасын есепте алға шығарды. Ал 35-минутта төрешілер қазақстандық командаға қатысты тағы да тәр­тіптік шара қолданып, Андрей Шутов қақпасына буллит та­ғайындады. Оны өз кезегінде Юрай Слафковски айна қатесіз орындап, есепті – 4:2-ге жеткізді.

Үшінші кезеңнің басында Қазақстан құрамасы Ки­рилл Панюковтың арқасында жыл­дам есеп айырмасын қыс­қартқанымен, матч соңына дейін Юрий Михайлис шәкірттерінің таразы басын теңестіруге шамасы жетпеді. Қорытынды есеп – 3:4. Осылайша, Қазақстан құрамасы қатарынан бесінші мәрте жеңілістің кермек дәмін татуға мәжбүр болды.

«А» тобының бесінші турынан кейін Швейцария құрамасы 15 ұпаймен жеке-дара көш бастады. Ал 12 ұпайы бар Канада мен Германия екінші және үшінші орындарды бөлісіп тұр, 9 ұпай­дан иеленген Дания мен Сло­вакия сәйкесінше бесінші және алтыншы орынға жайғасқан. Сон­дай-ақ екі жеңісі бар Франция алтыншы сатыға жайғасса (5 ұпай), дәл осы «үш жолақты» елдің хоккейшілерінен овертайм­да жеңілген Италия бір ұпай енші­леп, жетінші орынға тұрақтады.

«В» тобында Финляндия 16 ұпаймен көш бастап тұр. Кейінгі орындарға Швеция (12 ұпай), Чехия (10), АҚШ (10), Латвия (5), Норвегия (5), Аустрия (4), Ұлыбритания (1) жайғасты.

Жерлестеріміз кеше топтық кезеңнің алтыншы туры аясында Германия құрамасымен кездесті.

Соңғы жаңалықтар

Коронавирус жұқтырғандар көбейді

Коронавирус • Бүгін, 10:29

Газеттер «сөйлеген» күн

Қазақстан • Бүгін, 08:34

Түркияда бақ сынайды

Спорт • Бүгін, 08:33

Әбиба қола алды

Спорт • Бүгін, 08:32

«Уимблдон» додасы басталды

Спорт • Бүгін, 08:30

Байтұрсыновқа арналған байқау

Ахмет Байтұрсынұлы • Бүгін, 08:22

Мемлекетті айыптап отыр

Әлем • Бүгін, 08:17

Сал-серінің соңы

Қазақстан • Кеше

GGG – CANELO: Ер кезегі үшке дейін...

Кәсіпқой бокс • Кеше

Алаш ардақтысын түркі әлемі ұлықтады

Ахмет Байтұрсынұлы • Кеше

Ұқсас жаңалықтар