![Гарвардтан шақырту алды](/media/2022/05/24/crop-8_7_1265x1141_7456.jpg)
Қолына аттестат алғаннан кейін Анель Жүнісова Оңтүстік Кореядағы Ulsan National Institute of Science and Technology деп аталатын оқу орнына түсіп, «Биомедициналық инженерия» және «Бизнес-әкімшілік» мамандықтары бойынша қос диплом бағдарламасын таңдады.
Университетте жүргенінде ол ғылым мен қоғамдық жұмысты ұштастырып, белсенділігімен көзге түсті. Атап айтқанда, Анель екі жыл бойы 50 ұлт өкілінен тұратын UNIST Халықаралық студенттер ұйымының президенті болды. Бұған қоса ол NIS Alumni-дің Оңтүстік Кореядағы филиалын құрды. Оның бағдарламасы бойынша жергілікті жоғары оқу орындарына түсуге 600-ден астам талапкер үшін тегін тәлімгерлікті қамтамасыз етуге және түрлі іс-шаралардың көмегімен Қазақстаннан Оңтүстік Кореяға келген студенттерді біріктіруге қаржы бөлінді.
Мұның өзі Анель Жүнісоваға Сингапур ұлттық университеті жанындағы аурухананың бір бөлігі саналатын Сингапур клиникалық зерттеулер институтында ақылы тағылымдамадан өтуге жол ашып, ол жарты жылға Кореядан осы елге көшіп барды.
Анель өзінің осындай шешім қабылдағанына қуанышты екенін айтады. Өйткені дәл осы жерде педиатриялық неврология бөлімінде өзі армандаған бағытымен қауыша алды.
– Мен 3-7 жас аралығындағы балаларда аутистік бұзылыстың дамуы мен пайда болуын зерттеу бойынша өзімнің зерттеу жобамды қаржыландыру көзіне қол жеткізе алдым. Зерттеуім МРТ суреттерін, генетикалық биомаркерлерді және балалардың жалпы психиатриялық жағдайын талдаудың пәнаралық интеграциясына негізделген, – дейді жас ғалым.
Гарвардта Анель есте сақтау, альцгеймер, клиникалық депрессия процестерін және аутизмді зерттемекші. Нақтырақ айтқанда, ол миды зерттеудегі іргелі кітаптардың, нұсқаулықтардың және бағдарламалық жасақтаманың авторларымен бірігіп жұмыс істей отырып, өзінің жобаларын дамытуды жалғастырады.
Қарағанды облысы