Албанияның бас шаһары – Тиранадағы «Эйр Албания» стадионында ұйымдастырылған кездесуде матч тағдырын Николо Дзаньолоның жалғыз голы шешіп кетті. Осылайша, Римнің «Рома» клубы Еурокубок тарихындағы жаңа турнирдің алғашқы жеңімпазы атанды. Бұл – «Романың» 1961 жылғы «Жәрмеңке кубогынан» (қазіргі Еуропа лигасы – ред.) кейін жеңіп алған алғашқы ірі жетістігі. Ал «Фейеноорд» өз тарихында бір рет Еуропа чемпиондар кубогы (қазіргі Чемпиондар лигасы – ред.) мен екі рет УЕФА кубогында (Еуропа лигасы) топ жарған.
Конференция лигасының алғашқы маусымында Қазақстанның «Қайрат» клубы топтық кезеңге дейін жетіп, бірде-бір ойында жеңіске жете алмай, өз квартетінде соңғы орында қалып қойған болатын.
