ТҮРКІШІЛ ТҰЛҒА

Жыл сайынғы оқу маусымы аяқ­таларда Л.Н.Гумилев атын­дағы Еуразия ұлттық универ­си­тетінде “Күлтегін күндері” өт­кі­зі­леді. Бұл мәдени іс-шара уақыт өткен са­йын қоғамдық сипат алып келеді де­сек қателес­пейміз. Оның нақты дәлелін атал­мыш оқу орнындағы апталыққа сту­дент­тер мен оқыту­шылардан бас­қа қоғам қайратке­рлері, хал­қы­мыздың қалаулы, елге еңбектері сіңген азаматтардың қа­тысқан­дарынан анық байқаймыз. Бұрнағы күні университеттегі “Күлтегін күндерінің” аясында филология факультетінде атақты түркітанушы ғалым, Еуразия идеясының бастауында тұрған ірі тұлға Лев Гумилевке арналған шығармашылық кеш өткізілді. Жиынның алғашқы сөзін уни­верситеттің ғылыми жұмыс­тар жөніндегі проректоры Бесін­бай Рахметқазы: “Төл тарихы­мыз­дың тамыры тереңде екен­дігін Күлте­гін ескерткіші дәлел­деді. Ұлттық рухани құндылық­тар жүйесін ұлт­тық идеология­мыздың тұғыры­на айналдыру істері біз үшін аса маңызды. Біз­дің университетіміз ұлт тари­хы­ның іргетасы болып саналатын көне түркі мұраларын зерттеп, оны халық игіліне жара­ту­дағы ғы­лыми орталыққа айна­луы тиіс. Л.Н.Гумилев Еуразия кеңістігіндегі халықтардың тари­хын, мәдени құндылығын әлемге танытуда елеу­лі еңбек сіңірген тұлға”, – деп бастады. Кеш барысында сондай-ақ осы жоғары оқу орнындағы ка­федра меңгерушісі Ғаділбек Ша­лах­метовтің Л.Н.Гумилев туралы жаз­ған “Живя в чужих словах” атты кітабының таныстыры­лы­мы болды. Кітаптың тұсаукесер рәсі­мінде автор өзінің атақты ғалым­мен бірге қызмет істеген кезең­дері­нен көптеген естеліктер кел­тіре келе өз сөзінде: “Күлте­гін ес­керт­кішінің ұстын тасында біздің қазіргі қоғамымызға керек, болашаққа үлкен бағдар сілтейтін тың идеялар жазылған. Бұл біз үшін тек қана тарихи ескерткіш емес, кешегіміз бен бүгінгімізді бір-бірімен сабақтас­тыратын, сонымен қатар ертеңі­мізге де телегей-теңіз тәлім бе­ре­тін рухани құндылық. Ал Л.Н.Гумилев тура­лы айтар болсам, ол кісінің біздің түркі жұрт­шылығына, әсіресе қазақ халқы­ның рухани өрке­ниеттілігіне қосқан үлесін еш­қашан да ұмытпауымыз керек. Бұл азаматтық та, адамдық та боры­шымыз”, – деді. Кеште ғұлама ғалымның кі­тап көрмесі де ұйымдас­тыры­лып, со­ңында оның өмірі мен шы­ғарма­шылығынан тұра­тын театрлан­дырылған көріністер қойылды. Арай ҮЙРЕНІШБЕКҚЫЗЫ.