Үш аптаға созылған бәсекеде велошабандоздар Мажарстан мен Словенияның шекарасын кесіп өтіп, Италиядағы жарыс кезеңдерін қоса есептегенде, жалпы ұзақтығы 3445,6 шақырым жолды артта қалдырды. Сондай-ақ спортшылар осы аралықта биіктігі 50 шақырымға дейін жететін Этна, Блокхаус, Мортироло, Пордой, Федайя сияқты таулы кезеңдерді де бағындырды.
Биыл 105-ші мәрте ұйымдастырылған «Джиро д’Италия» додасы Мажарстанда жалпы кезеңмен басталып, жекелей жарыс кезеңімен мәресіне жетті. Верона қаласының 4-санаттағы биік шыңымен өткен соңғы жарыс күнінде 25 жастағы Италия чемпионы Маттео Собреро (BikeExchange – Jayco) жеңімпаз атанды. Ол 17,4 шақырым қашықтықты 22 минут 24,54 секундта орташа 46.588 км/сағ жылдамдықпен жүріп өтті. Мәре сызығын жеңімпаздан 15 секунд кейін кескен Team DSM велокомандасының өкілі Тимен Аренсман (Нидерланд) екінші орынға ие болса, тағы бір нидерландтық велошабандоз Матье ван дер Пул (Alpecin-Fenix) үшінші орынға табан тіреді. Ол Маттео Собреродан 33 секундқа қалып қойды.
BikeExchagne-Jayco велокомандасының өкілдері биылғы «Джиро д’Италияның» екі бірдей жекелей кезеңінде үздік шықты. Будапештте 9 шақырымға созылған алғашқы жекелей жарыста Саймон Йейтс топ жарса, күні кеше Маттео Собреро алдына жан салмады. Сондай-ақ С.Йейтс 14-кезеңнің жеңімпазы атанды.
Соңғы кезеңдегі М.Собрероның жеңісі жалпы есептегі үздік үштіктің нәтижесіне еш әсер еткен жоқ. 21 кезеңнің қорытындысы бойынша, биылғы «Джиро д’Италия» додасында 26 жастағы аустралиялық Джей Хиндли (Bora-hansgrohe) 86 сағат 31 минут 14 секунд көрсеткішімен бас жүлдені жеңіп алды. Бұл оның карьерасындағы төртінші «Джиросы» болды. 9-шы ең биік таулы кезеңде жеңімпаз атанған Хиндли 14-кезеңнен 19-кезеңге дейін жалпы есепте эквадорлық Ричард Карапасты (Ineos) өкшелеп келді де, соңғы аса күрделі таулы 20-кезеңде оны шаң қаптырып, көшбасшыға тиесілі қызғылт жейдесін киді. Ал жалпы есепте екінші орынға табан тіреген Р.Карапас аустралиялықтан 1 минут 18 секундқа қалып қойса, үздік үштікті Джей Хиндлиден 3 минут 24 секунд ұтылған «Астананың» экс-велошабандозы испаниялық Микель Ланда (Bahrain Victorious) қорытындылады.
Ал қазақстандық «Астана» велоклубының өкілдері арасында ең үздік нәтижеге «Джиро д’Италияның» екі дүркін жеңімпазы, 37 жастағы ардагер велошабандоз италиялық Винченцо Нибали қол жеткізді. Жеңімпаздан 9 минут 2 секундқа қалып қойған Нибали жалпы есепте төртінші орынға тұрақтады. Astana Qazaqstan Team басшылығының әуелгі жоспары бойынша биылғы додада Мигель Анхель Лопеске сенім артылып, бүкіл командаластары колумбиялықтың көмбеге қарай еркін жетуіне мүмкіндік жасауға тиіс еді. Алайда Лопес «Джироның» 4-кезеңінде жарақатына байланысты жарысты ерте аяқтауға мәжбүр болды. Сөйтіп, команданың бар жауапкершілігі Винченцоға жүктелді. Жарыс бел ортаға таяған тұста, яғни 9-кезеңде Нибали сегізінші орынға табан тіресе, 14-кезеңде жүлделі орынға бір саты қалғанда тоқтады. Сөйтіп, осы кезеңнен бастап ол жалпы есептегі ТОП-10 велошабандоздың қатарына қосылды. Одан кейін «Астана» капитаны 16-кезеңде бесінші, 18-кезеңде төртінші орынға көтерілді. Дүбірлі дода аяқталғанға дейін Винченцо сол орнын сақтап қалды.
Биылғы «Джиро д’Италияның» жекелей аталымдарына тоқталар болсақ, 30 жастағы франциялық Арно Демар (Groupama-FDJ) карьерасында екінші рет ұпай классификациясында топ жарса, 28 жастағы нидерландтық Кун Бауман (Jumbo-Visma) таулы кезеңінің үздігі атанды. Сондай-ақ Trek-Segafredo командасының испаниялық өкілі Хуан Педро Лопес жарыстың ең үздік жас велошабандозы атағына ие болды. Бұл сында 22 жастағы қазақстандық Вадим Пронский бесінші орынға тұрақтады. Ал Bahrain Victorious велоклубы командалық жалпы есепте үздік шықты. «Астана» ұжымы бесінші сатыға жайғасты.
