Балаларға бауырмал бас қала

Нұр-Сұлтан қаласының әкімі Алтай Көлгінов бас шаһарда балалардың шы­ғармашылығы мен білімін дамытуға ар­налған бірнеше орталық ашылғанын мәлім етті.

– Халықаралық балаларды қорғау күні өнер-білім, танымдық және оқу орта­­лықтары, аулалар ашылды. Сондай-ақ елорданың барлық ауданында фес­тивальдар, спорттық жарыстар мен кон­церттер өтті. Мәселен, «Білім-парк» өнер-білім орталығы ашылды. Он­да балалар роботтехникамен, кеме үлгі­леумен, авиамодельдеумен, видеографикамен айналыса алады. Сол сияқты бокс­пен шұғылданып, домбыра шерту мен шахмат ойнауды үйренеді. «Білім-парктегі» сабақтар тегін. Балалар оған Оқушылар сарайының сайты арқылы жазыла алады, – деді А.Көлгінов.

Сонымен қатар қала басшысы Оқу­шылар сарайының бос тұрған орындарын пайдалана отырып, қызметі айтар­лықтай кеңейтілгенін атап өтті.

– Онда SANA креативті білім беру орталығы мен TANYM креативті тех­но­­логиялар орталығы ашылды. Бұл орталықтарда балаларға бағдар­ламалау және компьютерлік графика дәрістері өтеді. Ал ойын барысын­да балалар қажетті білім мен дағдыларды, әсіресе роботтарды бағдарламалауды, логикалық ойлауды үйренеді. Ал сабақтары тегін өткізіледі. Кездесу соңында түлектерімізбен, сондай-ақ халықаралық және рес­пуб­ликалық олим­пиадалардың жеңім­паздарымен әңгіме өрбіттік. Коман­дамыз жыл са­йын республикалық олимпиадаларда «Үздік олимпиадалық команда» атағына ие болып келеді. Биыл біздің команда рекорд орнатып, 93 жүлделі орынға ие болды. Мұның бәрі – ұстаздардың, мектеп оқушыларының және олардың ата-аналарының тынымсыз еңбегінің жемісі. Мемлекет басшысы осы жылды Балалар жылы деп жариялады. Өскелең ұрпаққа жағдай жасау бойынша тиісті жұмыстар жүйелі жүріп жатыр: мектептер саламыз, ұстаздардың жалақысын арттырамыз, танымдық және оқу орталықтарының желісін кеңейтеміз, – деді елорда әкімі.

Мереке күні таңертең қаладағы ауруха­налардың акушерлік блокта­рының бәрінде жаңа туған нәрестелерге арнал­ған іс-шаралар ұйымдастырылды. Нұр-Сұлтан қаласы Қоғамдық ден­саулық сақтау басқармасының басшысы Тимур Мұратов қала басшылығының атынан бақытты аналарды қос мерекемен құттықтап, елорда әкімі Алтай Көлгіновтің Алғысхатын табыстады.

– Бүгін сіздер үшін екі бірдей мереке. Дүниеге ұл-қыздарды әкеліп отырсыздар. Өмір есігін енді ашқан сәбилеріңіз еліміздің абыройлы, бетке ұстар азаматтары болсын. Тек бір әулеттің ғана емес, барша қазақ елінің мақтанышы болып өссін. Болашақтары жарқын болсын, – деп құттықтады басқарма басшысы.

Қалалық емханаларда Ашық есік күндері аниматорлардың қатысуы­мен мерекелік бағдарламаларға ұласты. Бүлдіршіндердің асыр салып, асы­ға күтетін мерейлі мерекесі елорда­ның 4 ау­­­данында да жоғары деңгейде ұйым­дастырылып, кішкентай тұрғын­дарды қуаныш пен шаттыққа бөледі.

Есіл ауданында орналасқан Жетісу саябағында Б.Соқпақбаевтың «Менің атым Қожа» шығармасы негізінде салынған ескерткіштің ашылуы көптің көңілінен шықты. Ескерткіш ашу идеясын жазушы Жанболат Аупбаев ұсынған. Ол қазақ халқының бала тәр­бие­леуге ежелден ерекше мән бере­тінін айта келе, осы бір болмысты бейнелейтін Б.Соқпақбаев повесінің кейіпкеріне монумент орнату жөнінде ойын айтты. Ескерткіштің биік­тігі – 183 см, ол қоладан және гра­нит­тен жасалған. Мүсінші Азамат Талап­ханның айтуынша, жұмыс үш айға созылған.

– Маған осы ескерткішті жасау туралы ұсыныс түскен бойда түрлі идеяларды ойластыра бастадым. Ескерткіш арқылы бас кейіпкердің мінезін көрсету, шығарма желісін жеткізу өте маңызды болды. Сонымен, фильмнің есте қалар­лық көріністерінің бірін бейнелеу жө­нінде шешім қабылдап, Қожаның айна алдында отырған сәтін көрсеттік, – деді монумент авторы.

Сонымен қатар елордаға еліміздің барлық өңірінен 30-дан астам мектеп оқушысы келіп, оларға танымдық экскурсия өткізілді. Іс-шараға арнайы шақы­рылған оқу озаттары мен зияткерлік және шығармашылық бай­қаулардың жеңімпаздары әуелі «Ақорда» резиденциясын аралады. Сон­дай-ақ Бәйтерек монументіне шықты.

– Мұндай іс-шаралар балаларымыз­дың осы елдің азаматы екендігін, олар­дың болашақта Қазақстан үшін үлкен рөл атқаратындарына сенім береді. Оқу-білімге құштарлықтарын арттырады, – деді Нұр-Сұлтан қаласы білім беруді жаңғырту орталығы басшысының орынбасары Сындар Мұратқызы.

Мерекеге орай «Balapan әлемі» OPEN AIR фестивалі өтіп, 800-ге жуық жас өнерпаз мерекелік іс-шарада өнер көрсетті. Республикалық деңгейдегі ауқым­ды іс-шара Есілдің жағасындағы ам­фитеатрда өтті. Әр өңірден келген талантты бүлдіршіндер осы жерде өнер­лерін ортаға салып, түрлі байқауға қа­тысты. 100 домбырашы бір мезетте күй ойнап, «Qazaqstan дауысы. Балалар» жобасының қатысушылары әннен шашу шашты. Сонымен қатар амфитеатр маңында мерекеге орай түрлі спорттық шаралар, қолөнер жәрмеңкесі мен кітап көрмесі ұйымдастырылды. Ұлттық ойын­дар ойналып, балалар асфальтқа сурет салды.

Балалардың сағына күтетін мереке­сін Сарыарқа ауданының сәбилері де көңілді өткізді. Ойын-сауыққа толы күн ерекше естерінде сақталары сөзсіз. Халықаралық мереке аясында ин­клю­зивті спортты дамыту және саламатты өмір салтын насихаттау мақсатында мерекелік іс-шара ұйым­дас­тырылды. Биылғы мейрам атал­ған ауданның үш жерінде өтті. Demalys promenade алаңында, Көктал саябағында және Арбатта жалғасты. Demalys promenade-та artsportedu мер­дігерлері ауқымды фес­тиваль өткізді. Мереке қонақтарын аниматорлар қарсы алды. Ал сахнада 2000-нан ас­там бала өнер көрсетті. Мұнда бала­лар суреттерінің үлкен көрмесі өтті. Концерт көрермендеріне балмұздақ таратылып, аквагрим жасалды. Мереке таңертеңнен кешке дейін тойланды. Сонымен қатар «Дәулет» теннис орталығы ұйымдастырған Ашық есік күніне 250 бала қатысты.

– Іс-шараның басты мақсаты – бала­ларға спортты көңілді ойын түрінде таныстыру. Бұл балаларды саламатты өмір салтына тартуға мүмкіндік беріп, спорт­тың қаншалықты көңілді және пайда­лы екенін көрсетеді, – деді теннис орта­лығының жетекшісі Дина Темір­ғалиева.

Осыған ұқсас спорттық іс-шаралар бір уақытта үш жерде – «Дәулет» тен­нис орталығында, Ботаникалық сая­бақтың теннис кортында, Көктал сая­бағының теннис кортында өтті. Іс-шараға 6 жастан 10 жасқа дейінгі 250 бала қатысып, бағдарлама барысын­да тапсырмалар, эстафеталық ойындар, билер ұйымдастырылып, пайда­лы тағамдар ұсынылды. Сонымен қатар Көктал саябағында теннистен шебер­лік сағаттары мен көңілді старттар өтті. Саябақтың кішкене қонақтарына «Дәу­лет» теннис орталығының кәсіби жат­тықтырушылары үлкен теннис ойыны бойынша шеберлік сағатын өткізді. Балаларға ракеткамен қалай дәл ұру, тепе-теңдікті сақтау, жылдамдық пен координацияны дамыту туралы айтылды. Бұдан бөлек балалар арасында көңілді старттар өтті. Спартакиада жеңімпаздары марапатталды.

Ал айтулы мереке қарсаңында Алма­ты ауданы Интернациональный тұрғын алабындағы Мереке көшесі, 40-үйдің жаңа ауласы мен сол маңдағы скверді абаттандыру жұмыстары аяқталды. Биыл жазда ауданда 80 жаңа аула алаңы салынады, абаттандыру, жарықтандыру және көгал­дандыру жұмыстары кешенді түрде жүргізілуде. Бірінші кезекте қала­­ның ескі бөлігіндегі шағын аудан­дарда жаңа аула алаңдарын орнату қажет болды. Бүгінгі күні Тәуелсіздік, Қажы­мұқан, Жұмабаев, Майлин көше­­леріндегі жұмыстар аяқталды. Жал­пы көшелерге 250 тренажер, 30 workout аймағы орнатылады, 20 спорт алаңы жөнделіп, 15-і жаңадан салынады. Аталған ауданның Студенттер саябағында балаларды қорғау күніне арналған мере­келік бағдарлама ұсы­нылды. Ұйым­дастырушылар арба ше­руін, вело­сипедшілер байқауын және 6 айдан 39 айға дейінгі балалар арасында ең­бек­теуден жарыс өткізді. Дәл сол күні Әл-Фараби атындағы оқушылар сарайы алаңында шығармашылық ұжым­­­дардың қатысуымен мерекелік кон­­­церт, сондай-ақ Samga чемпиондар лигасы жас спортшыларының көрсетілімдері ұйымдастырылды. Алаң­да балалар суреттері мен қолдан­балы шығармашылық көрмесі, «Жаздың айшықты бояулары» атты асфальтта сурет салу конкурсы өткізілді.

– Мен Балалар күнін ерекше күте­мін. Себебі ол күні біз ата-анамызбен серуен­деп, түрлі ойындар ойнап, көңіл көтереміз. Қыдырамыз. Биылғы мере­ке де шаттық пен қызыққа толы болды. Жаңа достармен таныстым, сурет салдым, өзіме қатты ұнады. Біз­ге осындай көңіл күй сыйлаған ұйымдас­тырушыларға алғыс айтамын, – деді қала­мыздың кішкентай тұрғыны Аяла Нұрлыбек.

Нұр-Сұлтан қаласы әкімдігінің «Ма­мандандырылған балалар үйі» мем­лекеттік коммуналдық мекемесінде ме­рекеге арналған «Ғарыш әлеміне сая­хат» атты салтанатты іс-шара өтті. Бүлдіршіндерді мерекемен құттықтап, түрлі сыйлықтарымен қуаныш сыйлау мақсатында Нұр-Сұлтан қаласы Денсаулық сақтау басқармасының басшысы Тимур Мұратов, Нұр-Сұлтан қаласы Білім басқармасы қамқоршылық және қорғаншылық органы өкілдері, «Мереке» қайырымдылық қорының өкілдері, меценаттар мен демеушілер, Нұр-Сұлтан қаласы әкімінің аппараты Әйелдер істері және отбасылық-демографиялық саясат жөніндегі комис­сиясының бас инспекторы-хатшысы Қарлығаш Сабитқызы мен әйелдер істері жөніндегі комиссия мүшелері келіп, салтанатты мерекелік іс-шараның қадірлі қонағы болды. Бүлдіршіндер мен қонақтар – Ғарышкер, Қарақшы, Кемпірқосақ, Күн және Бұлттармен бірге «Ғарыш әлеміне» саяхат жасады. Ғажайыпқа толы ғарыш әлемінде балаларымыз өз өнерлерін ортаға салып, «Жұлдыздар», «Күн сәулелері», «Ақ бұлттар», «Күн жүйесіндегі ға­лам­шарлар», «Ғарыш­керлер» биі мен «Зымыран» флешмобын билеп, «Жұл­дыздарды жина», «Күн мен Жаңбыр» атты қызықты ойындарды ойнап қуа­нышқа кенелді. Сонымен қатар балаларды қуанту мақсатында аталған мекемеге Қазақстанды әлемге танытқан олимпиа­да чемпиондары, халықаралық спорт шеберлері келді. Олардың қатарында, бокстан Әлем чемпионы Мерей Ақша­лов пен Азия чемпионы Василий Ле­вит, белгілі зілтемірші, Олимпиада ойын­дарының екі дүркін чемпионы, әлемнің төрт дүркін чемпионы Илья Ильин атбасын бұрды.

– Еліміздің мақтаныштары Мерей Ақшалов, Василий Левит, Илья Ильин орталығымыздың қадірлі қонағы болып, мерекелік іс-шарада бүлдіршіндерімізге арнайы әкелген сыйлықтарын табыстады. Мерекелік іс-шара өте қызықты өтті. Қылықты балапандарға түрлі тәттілер мен әдемі ойыншықтар үлестіріліп, ме­рекелік бағдарлама есте қаларлық ес­телік суреттерге түсумен ұласты, – деді Балалар үйінің директоры Сауле Кенжетайқызы.

Елордадағы Байқоңыр ауданы әкім­дігі Балалар жылы аясында аста­на­лық мектептер арасында «Менің қолымнан келеді» байқауын өткізді. Екі айға созылған байқау өз мәресіне жетіп, Халықаралық балаларды қорғау күні қарсаңында байқау жеңімпаздары марапатталды. Жарыс қорытындысы бойынша бірінші орынды Фариза Оңғарсынова атындағы №77 мектеп-гимназиясының 4 «з» сынып оқушысы Арсен Қазақбаев жеңіп алса, екінші орынды Абай атын­дағы №87 мектептің 6-сынып оқу­шысы Мирас Әбубәкір иеленді. Жүл­делі үшінші орынмен №27 мектеп-лицейі­нің 2«ә» сынып оқушысы Даяна Бе­кенова марапатталды. Үздіктерге «Бай­қоңыр» ауданы әкімдігі атынан ба­ғалы сыйлықтар мен дипломдар беріл­ді. Бұдан бөлек, байқауға қатысқан басқа қатысушылар да назардан тыс қалмады. Өздерінің ерекше жұмыстарын ұсынып, байқауда бақ сынаған барлық қатысушыға Байқоңыр ауданы әкімдігі атынан «Мектепке жол – 2022» акциясына қатысу сертификаттары табысталды.

Қаладағы «Қаламгерлер» аллея­сында өткен мерекелік іс-шара кіш­кентай тұр­ғындарға көтеріңкі көңіл күй сыйлады. Ән айтылып, би билеп, бүлдіршіндер шаттыққа кенелді.

– Әрбір ата-ана балаларының бақыт­ты болғанын, үнемі күліп жүргенін қа­лайды. Олардың шаттыққа толы жүзін көру – бізді де қуанышқа кенелтеді. Бүгінгі мерекеде сәбилеріміз мәз болып, шаттанып, ерекше сезімге бөленді. Оларды көріп біздің де қуанғанымыз рас. Жыл сайын Халықаралық балаларды қорғау күні кеңінен аталып өтілуде. Балапандарымыздың асыға күтетін мейрамы биыл да жоғары деңгейде өтті. Қаламыздың әр жерінде мерекелік, думанды көңіл күйді сезіндік, – деді ата-аналар.

Балаларды қорғау күні Байқоңыр ауданының орталық алаңдарынан бас­­тап тұрғын алаптарға дейін кеңі­нен аталып өтіп, балақайлар үшін мере­келік концерттер мен аула мерекелері өткізілді. Сонымен қатар «Казгородок» тұрғын алабында балалар арасында футболдан турнир өтті. Турнирде үз­дік ойын көрсеткен ойыншылар мен командалар марапатталып, арнайы сыйлықтар мен дипломдар табыс етілді. Бұдан бөлек, «Көңілді мә­ре» ойындары ұйым­дастырылып, аниматорлардың қызықты сайыстары мерекені жандандыра түсті.