Жақында кезекті 72 отбасы қоныс тойын тойлады. Оның 18-і көпбалалы отбасыларға үлестірілсе, қалғаны жетім балаларға, әлеуметтік осал топтың мүшелеріне берілді.
Баспанаға ие болған тұрғындардың бірі – Ләйлә Әшірбекова. Ол 14 жастағы мүмкіндігі шектеулі қызын жалғыз өзі тәрбиелеп отыр. 14 жыл бойы пәтер жалдап келген.
«Бұған дейін ұзақ жылдар бойы пәтер жалдап тұрдым. Баспанаға қол жеткізіп отырғаныма қатты қуаныштымын. Осы сәтті асыға күттік. Қиын күндердің барлығы артта қалды деп үміттенемін. Мемлекет тарапынан зор қолдау көрсетілгеніне ризамын. Мен өте бақыттымын», дейді Ләйлә Әшірбекова қуанышы қойнына сыймай.
Аталған үй «Нұрлы жер» мемлекеттік бағдарламасы шеңберінде салынған. Жалпы, соңғы екі жарым жылда аталған бағдарлама бойынша 1 359 пәтер үлестірілді. Соның есебінен 5 500-ден астам адам тізілген үй кезегі 11 пайызға қысқарған.
Павлодар облысы,
Екібастұз қаласы
