ДАМУДЫҢ СЫРЫ – БІРЛІКТЕ, ТАБЫСТЫҢ СЫРЫ – ТІРЛІКТЕ
Н.Ә.НАЗАРБАЕВ: «Дамудың сыры – бірлікте, табыстың сыры – тірлікте» екенін баршаңыз білесіздер. Мұратқа жолын тапқан жетеді. Еңбегіміздің жанбағы біздің ортақ үйімізді бейбітшіліктің бесігі етіп, барды бағалай білуімізге байланысты. Қазақты қасиетті қарашаңыраққа баласақ, еліміздегі барша этностар – сол шаңыраққа шаншылған уықтар. Қазақстан халқы Ассамблеясының ХХІ сессиясында сөйлеген сөзінен.
Мені Елбасы Нұрсұлтан Назарбаевтың әр кезеңдерде жаңа мемлекет пен егемен ел азаматтары алдында тұрған қадау-қадау міндеттерге қатысты нақыл сөзге бергісіз қысқа да нұсқа, дәл де нақты айтқан сөздері әркез тәнті етеді. Кешегі өткізілген Ассамблея сессиясында да ойлы образға бөлей отырып айтқан Елбасының терең тұжырымға толы қағидаттарын сүйсіне тыңдадым.
Айталық, бірлік «Қазақстан- 2050» Стратегиясын жүзеге асырудың шешуші факторы екенін көрсеткен Елбасы бұдан кейін: «Біздің экономикамызда ешкім этносына қарап бөлінбейді», деп түйін түйді. Бұл жүректерге бірден жол таба алатын бейнелі де бедерлі сөз екеніне отандастарымыздың бәрі де келісетін шығар. Мемлекет басшысының бұл ойлы сөз тіркесін мен сол сәтте қойын дәптеріме түртіп алдым.
Иә, қазіргі күні қазақстандықтардың дені көп этносты ұжымдарда еңбек етеді. Солардың бірі – біздің «Айдана» ЖШС. Алайда, осыған қарамастан, олардың қай-қайсысына да этностық жіктелушілік үрдісі мүлдем жат. Біз мұны ұжымдық және өндірістік тәжірибемізден көріп жүрміз. Ел экономикасының дамуы және өмір сүру деңгейі мен сапасының артуы үшін олардың бәрі де ортақ жауапкершілік арқалайды. Барлық жердегідей біздің Орал өңірінде де шағын және орта бизнесті өркендету ісінде қол жеткен табыстар аз емес. Соның бәрібір жағадан бас, бір жеңнен қол шығара білген ауызбіршілік пен ынтымақтастықтың нәтижесі. Ең жақсы дамыған мемлекеттердің отыздығына ену – барша қазақстандықтардың ортақ мақсаты десек, бұған да жұмған жұдырықтай жұмыла кіріскен іс керек. Біздің осындай бірлік пен тірлік үлгісін көрсетіп жүргеніміз де жай айтыла салатын сөз емес.
Қазақстан экономикасы – бөлшектелмейтін, бөлінбейтін біртұтас экономика. Оның деңгейі де осындай сипатына орай республика азаматтары бірлесе, тізе қосып қимылдаған кезде ғана одан әрі тұлғаланып, дами түсетініне күмән жоқ. Сессияда сөйлеген сөзінде, экономика этносқа бөлінбейді деп тұжырым жасаған Нұрсұлтан Әбішұлының ойлы да образды сөзінің қадір-қасиеті мен құндылығы да осындайда одан әрі биіктей береді деп ойлаймын.
Сондай-ақ, барлық қазақстандықтар мен республикадағы барлық этностар Жалпыға Ортақ Еңбек Қоғамын қалыптастыру кезінде де бір тұғырдан табылса, бұл қоғамның бәсі соғұрлым арта түседі. Әрі мұндай фактор елдегі тұрақтылық пен келісімнің ойдағыдай іске асуының да басты бір көрінісі. Осылайша Президент бірлік пен «Қазақстан-2050» Стратегиясын іске асыру ұғымдарын бір, өзара тең қатарға қояды. Сонымен бірге, Елбасы осы үндестікті тереңдеткен алтыншы тармақта бүкіл Қазақстан еңбек, жауапкершілік және тәртіп арқылы ғана дами алады деп ой түйді.
Біраз жылдардан бері өндіріс, шағын және орта бизнес саласында қызмет атқарып жүргендіктен, осы мәселелерге қатысты Мемлекет басшысының сессияда айтқан сөздері қанат бітіргендей күй кештім. Әрі осындай өршіл сезім күйі жетегімен көкейге келген кейбір ой-пікірімді Отанымыздың бас газеті оқырмандарымен бөліскенді жөн көрдім.
Аветик АМИРХАНЯН,
Орал қаласындағы «Айдана» ЖШС-нің директоры,
Орал қалалық мәслихатының депутаты.
ОРАЛ.
