Татулық туын тіккен жер

«Алтау ала болса, ауыздағы кетеді. Төртеу түгел болса, төбедегі келеді» деген дана­­­лық сөзді қазақ халқы айтқан. Мұн­дай сөзді татулықтың тамырын терең түсіне­тін, бірліктің парқын өзгеден жақсы білетін, тұтастықтың пайдасын ұғынатын ел ғана айта алады. Ал қазақ халқы – ежелден тұрақ­тылық пен татулықты ту еткен ел. Олай болмаған жағдайда, бүгінде Қазақстанды мекен еткен өзге ұлт пен ұлыстың өкілдері бұл жерде тұрақтап қалмас еді. Осындай достық пейілдің арқасында өзге этнос өкілдері Қазақстанды туған отаны санайды. Өткен аптаның соңында Қазақстан халқы Ассамблеясының ХХІ сессия­сы өтті. Елбасы, Қазақстан халқы Ассамблеясының Төрағасы Нұрсұлтан Назарбаев баяндама жасады. Президент сөзін аса үлкен ынтамен тыңдадық. Нұрсұлтан Әбішұлы елімізде қалып­­­­­­­­тас­қан тұрақтылық пен тыныштықты сақтау үшін жеті түрлі құндылықты бас­шылыққа алу керектігін көлденең тартты. Ал осы құндылықтардың ішіндегі ең ма­ңыздысы ретінде халқымыздың бір­лігін атады. «Этностық, тілдік, діни және әлеу­меттік айырмашылығына қара­­мас­тан, бүкіл қазақстандықтар тең құқы­лы. Бізде қысым жасаудың кез келген түріне, бейбітшілік пен келісімге қол­сұғу­шылықтың кез келгеніне мейлін­ше жол жоқ және ол заңмен қатаң қуда­ланады», деді Елбасы. Өз басым Мем­лекет басшысының осы сөзін барша қазақ­стандықтардың бейбіт өмір сүруі үшін жасалған кепілдік ретінде қабыл­дадым. – Қазақстанда мемлекеттік тілдің рөлі, орыс тілінің ресми мәртебесі және барлық этностар мен олардың мәдениеттерінің тең жағдайда дамуы туралы мәселе шешімін тапқан. Биыл біздегі тілдер туралы алғашқы заңға 25 жыл толады. Болашақта бүкіл азаматтардың мемлекеттік тілді білуі бізді бұрынғыдан бетер теңдестіріп, бірлікті нығайта түседі. Міне, ширек ғасыр­дан бері біз тіл саясатында айқын бағыт­пен келеміз – мемлекеттік тілді біртін­деп дамытудамыз және бүкіл этностар тілдері­нің дамуы үшін жағдайлар жасаудамыз. Бүгінде тұрғындарының көпшілігі кем дегенде екі тілде сөйлейтін және ойлайтын елдер көп емес,– деді Нұрсұлтан Назар­баев. Бұл Қазақстанда тіл мен дінге қатыс­ты, салт пен дәстүрге байланысты, әрбір ұлт пен ұлыстың мәдени-рухани өміріне орай ешқандай алауыздықтың жоқты­ғын ай­қындайды. Бәріне бірдей жағдай жасал­ған. Ал мемлекеттік тіліміздің өркендеуіне өз­ге этностардың барлығы мүдделі болуы ке­рек. Өйткені, ол – біздің мемлекетіміздің тілі. Сонымен қатар, Президент тұрақ­­­ты­лық пен келісім әрбір әкімнің күнделікті жұмысының ең басты бағдары болуы керек деп атап көрсетті. Сайып келгенде, Пре­зиденттің ең басты мақсаты еліміздегі ты­ныштық пен тұрақтылықты мызғымас­тай сақтау екендігі көрініп тұр­ды. Ассамблея мүшелерінің бәрі де осы іске қолдарынан келген көмегін жасап, Презид­ент­тің көмекшілері болуы керек деп ойлай­мын. Соны әрбір Ассамблея мүшесі түсінуге тиіс. Людмила ЛИ, облыстық «Lev ami» еврей қоғамдық-мәдени бірлестігінің жетекшісі. ҚЫЗЫЛОРДА.