«Нұр Отан» партиясының қолдауымен Астанадағы «Керуен» сауда үйінің кинозалында «Өрмекші-адам: Кернеген қуат» фильмінің алдын ала көрсетілімі ұйымдастырылды.
Мемлекеттік тілді қолдау мақсатында «Болашақ» қауымдастығы төрт жылдан бері рейтингісі жоғары, көпшіліктің сұранысына ие танымал фильмдердің қазақша дубляжын жасаумен айналысып келеді. Бұған дейін прокатқа шыққан «Көліктер-2», «Қара киімділер-3», «Батыл жүрек», «Жаңа өрмекші адам», «Монстрлар университеті», «Жалғыз рейнджер» фильмдері соның айғағы.
Бұл жылы голливудтық фильмдерге дубляж жасау «Жастар – Отанға» жобасы аясында ұйымдастырылды. Жобаның мақсаты тек фильмдерді қазақшалау емес. Оның шеңберінде «Айтыс», «Бүркітшілер фестивалі», «Көкпар», «Қазақша күрес» жобалары да жүзеге асқанын айта кеткен жөн.
Ал енді фильмге оралар болсақ, ағымдағы жылы «Жаңа Өрмекші-адам: Кернеген қуат» фильмінің кейіпкерлері ағылшын, француз, испан, неміс, португал және орыс тілдеріне қоса, қазақ тілінде сөйлейтіні өз алдына, АҚШ-тағы негізгі тұсаукесерден 10 күн бұрын отандық экрандарға шығып қояды. Бұл туралы «Керуенде» ұйымдастырылған алдын ала көрсетілімде «Нұр Отан» партиясы Төрағасының бірінші орынбасары Бауыржан Байбек мәлімдеді. Оның айтуынша, 50 жылдан кейін үлкен экранға 3D форматында қайта оралған алғашқы «Жаңа Өрмекші-адам» фильмінің әлемдік кассалық жиналымы өз бюджетінен үш есеге асып түскен. Яғни, фильм 230 миллион долларға түсірілген болса, жиналымы 752 миллион долларға жеткен. Ал, қазіргі «Жаңа Өрмекші-адам: Кернеген қуат» фильмін түсіруге 200 миллион доллар жұмсалған. Оның ішінде ең жоғары халықаралық стандарттарға сәйкес қазақша жасалған дубляждың құны 80 мың АҚШ доллары болған. Бұл жерде атап өтер маңызды жағдай – «Алтын Қыран» қайырымдылық қорының осымен төртінші жыл қатарынан фильмдерді қазақ тіліне аударуда қаржылық көмек көрсетуі. Әсіресе, жастар арасында қазақ тіліндегі орта қалыптастыру мақсатында дубляждалған жаңа фильмнің де қаржылай қолдаушысы осы компания.
Голливудтық фильмдерді мемлекеттік тілге дубляждау жобасы аясында қазақ тіліне аударылған «Жаңа Өрмекші-адам: Кернеген қуат» фильмінің саундтрекін танымал рэпер Баста жазған. «Супергерой» саундтрегі фильмнің қазақ және орыс тілдеріндегі титрларында ойналатын болады. Фильмді дубляждау жұмысы өткен жылдың қараша айында басталған. Басты кейіпкерлерді Өрмекші-адам туралы алғашқы фильмнің дубляжын жасаған Мерей Әжібеков (Өрмекші-адам), Әлима Қайырбекова (Гвен Стейси), Тынышгүл Сұлтанбердиева (Тетя Мэй) сомдайды. Сондай-ақ, фильмдегі басты жағымсыз кейіпкер – Электроны сомдаған Азамат Қанапия бұдан бұрынғы жобалардағы дауысы үшін Уолт Дисней тарапынан үздік деп танылғанын да айта кету керек.
Айгүл СЕЙІЛОВА,
«Егемен Қазақстан».
