Спортты дамыту дирекциясының баспасөз қызметі таратқан ақпарат бойынша, чемпионаттың алғашқы күні қылыштасу бәсекесінде отандасымыз Артем Саркисян араға 17 жыл салып қола медаль жеңіп алды. Бұл сында Қазақстан құрамасының спортшылары ең соңғы рет 2005 жылы Малайзияда өткен Азия чемпионатында үздік үштіктің қатарынан көрінген еді. Яғни сол жылы Игорь Цель де қола медаль иеленген болатын.
Жалпы, Сеулде ерлер арасында барлығы 62 спортшы қылыштасты. Артем іріктеуде 3 жекпе-жекте жеңіске жетіп, 1/64-ке жолдама алды. Сосын 1/32 айналымда ирандық Али Пакдаманды 15-9 есебімен ұтса, кейін қытайлық Сяо Линнен басым түсті – 15-14. 1/8 финалда отандасымыз қарсыласын дәл сондай есеппен жеңіп (15-14), үздіктер қатарына қосылды. Жартылай финалда алаң иесі Ку Бон Гильге 10-15 есебімен есе жіберіп, қола жүлдені қанағат тұтты.
