Бұған дейін де, яғни 2011 жылы «Оңтүстік Қазақстан облысының ең үздік хирургі» атанған және ресейлік «Бехтерев» атындағы медальдің иегері, жоғары санатты хирург Жәңгірхан Бимаханұлы 2013 жылы «Лапароскопиялық аппендэктомиядағы жаңа байлау әдісін» енгізіп, Әділет министрлігінің зияткерлік меншік құқығы комитетінен «Авторлық куәлік» алған білікті маман. Ал 2001 жылы Кентау қаласында және өңірдегі аудандар арасында алғаш рет лапароскопиялық хирургия енгізіліп, Оразбақов бастаған білікті мамандар операция жасауды қолға алған-ды. Бүгінде Кентауда барлық хирургиялық, гинекологиялық, урологиялық оталардың 30-ға жуық түрі эндовидеохирургия жолымен жасалады. Сонымен қатар қалалық орталық ауруханада биылдан бастап геморрой ауруларына жоғары сапалы миниинвазивтік Лонго операциясы жасалуда. Мұндай операциялар үлкен қалаларда және проктологиялық орталықтарда ғана жасалады екен. Аурухана хирургтері бұл операция түрін тәжірибе жүзінде оқып үйреніпті. Жәңгірхан Бимаханұлы Лонго операциясы геморройдың 3-4-ші сатысының классикалық емдік тәсілі екенін айтады.
– Ол көбіне еуропалық елдерде қолданылады. Бұл операциялардың аты – Степлерлі геморроидопексия. Шырышты және шырыш асты қабатының резекциясы. Операция арнайы құрал-саймандармен, резекциямен қатар айналасын титан скрепкаларымен тігу арқылы іске асырылады. Операцияның жасалу уақыты орташа есеппен 20-30 минутты алады. Екі-үш күнде ауру клиникадан шығарылады. Жалпы «хирургтің қолы – әйелдердікіндей нәзік, көзі – бүркіттікіндей қырағы, жүрегі – арыстандай айбатты болуы керек» деген сөз бар. Менің оған қосарым – сөзі дұрыс болуы керек. Яғни әрбір дәрігер кез келген адаммен тіл табысып, сөйлесе алуы қажет. Хирург болу өте қиын. Адамның қанын көру, онымен жұмыс істеу кез келген адамның қолынан келе бермейді. Үлкен жауапкершілікті талап етеді. Адам өміріне жауапты боласыз. Операция жасамас бұрын қалай болар екен деп ойланып шықсақ, операциядан кейін де түнімен ұйықтай алмайтын кездеріміз болады. Дәрісін беріп, уколын салып кететін басқа салаларға қарағанда, хирургия саласының салмағы өте ауыр. Десек те, хирургия бөлімшесінің қызметі – аурухананың айнасы. Хирургиясы жақсы аурухана жақсы көрсеткіштерге ие болады, – дейді дәрігер.
Түркістанға қарасты Бозбұтақ ауылында көпбалалы отбасында дүниеге келіп, орта мектепті үздік бітірген Жәңгірхан Бимаханұлы Ақтөбе мемлекеттік медицина институтын тәмамдаған соң, яғни 1990 жылы Кентауға келіп, хирургия және реанимация бөліміне қызметке орналасты. Кейіннен хирургия бөлімшесінің меңгерушісі қызметіне тағайындалды. Ал 2013 жылдан бері бөлімшеге урология, гинекология бөлімшелерінің қосылуына байланысты босатылған бөлім меңгерушісі қызметін атқаруда. Талай жанды ажалдан арашалап қалған маман бүгінде өңірдегі білікті хирургтердің біріне айналған. Жаны таза, еңбегіне адал дәрігердің қолы жеңіл екенін естігендер жер шалғайлығына қарамастан дертіне дауа сұрап, Жәңгірханды әдейі іздеп келетін болған. «Біз еңбек жолымызды бастаған жылдары операция жасағанда кеңес сұрайтын маман мүлде болмаған еді. Бар жауапкершілікті өз мойнымызға алып, операция жасайтынбыз. Ол кездегі медициналық құрал-жабдықтар мен оқу құралдары да қазіргімен салыстыруға келмейді. Қазір бәрі бар ғой. Адам денсаулығына қатысты қандай да бір жайтты білгің келсе, ғаламторға кіріп, қалаған мәліметті аласың. Ал біздер болсақ, мұқабасы ақжемделген кітабымызға жүгінетінбіз. Осылайша, медицина саласындағы жаңалықтарды өз бетімізше ізденіп, біліп отырушы едік. Қазіргі таңда медицинада бір ауруды емдеудің түрі күн сайын жаңарып жатыр. Өз басым дәрігерлер қызметінен қол үзіп, зейнетке шыққанша оқып, ізденіп өтуге тиіс деп ойлаймын. Өйтпеген жағдайда еліміздің медицина саласы заман көшінен қалып қоятынын жадымыздан шығармауымыз керек», дейді Жәңгірхан Бимаханұлы.
Түркістан облысы
