Коллажды жасаған Қонысбай ШЕЖІМБАЙ, «EQ»
Атырау облыстық полиция департаменті басшысының орынбасары Берік Амангелдінің айтуынша, «Полицияның сервистік моделі» қанатқақты жобасын енгізудің үш негізгі бағыты айқындалып отыр. Біріншісі – азаматтардың полицияға қолжетімділігін барынша жеңілдетуге бағытталған қадам. Екінші бағыт – қауіпсіздікті қамтамасыз ету және құқық бұзушылықтардың алдын алу. Үшіншіден, бұл – тұрғындармен тығыз байланыс.
– Өйткені қауіпсіздікті қамтамасыз ету проблемасын тиімді шешу жергілікті қоғамдастықтың белсенді қолдауымен ғана мүмкін болады. Осы бағытта учаскелік полиция инспекторлары тұрғындармен жүйелі түрде кездесулер өткізіп жүр, – дейді Берік Амангелді.
Ал штаб басқармасы бастығының орынбасары Алтынбек Қайырлиевтің мәліметінше, Атырау қаласының аумағында 3 507 бейнебақылау камерасы орнатылған. Оның 759-ы жедел басқару орталығына тиесілі болса, «Сергек» желісінде 1 997, «Интеграция» жүйесінде 750 камера бар. Бейнекамералар көлік қозғалысының жүрісін жедел бақылап, қауіпті жағдайлардың алдын алуға, құқық бұзушылықтың ізін суытпай анықтауға ықпал етеді. Көшеге орнатылған камералардың полиция жұмысының тиімділігін арттыруға, түрлі қылмыстың жедел ашылуына септігі тиіп отыр. Мәселен, жыл басынан бері жедел басқару орталығының бейнебақылау кезекші-инспекторлары 111 қылмысты әшкереледі. Ал Жылыой ауданында 2 қылмыс ізі суымай ашылған. Жыл басынан бері аталған камералар арқылы 8 671 әкімшілік құқық бұзушылық анықталған. Құқық бұзушылықтың 7 522-сі Атырау қаласының аумағында, 1 149-ы Жылыой ауданында тіркелген.
– Біздің облыста «Қорғау – қауіпті жүргізуші» мобильді қосымшасы іске қосылды. Бұл – жол ережесін тиімді бақылауға, жазаны бұлтартпау қағидатын сақтауға арналған автоматты жүйе. Мобильді қосымшамен жұмыс істеу үшін полиция қызметкерлері жаңа үлгідегі 100 планшетпен жабдықталды. Қазір облыс жолдарында 1 224 мың автоматты камера бар. Оның 51-і жол қиылыстарында, 153-і желілік учаскелерде орналасқан. Камералардың көмегімен жыл сайын 120 мыңға жуық жол қозғалысы ережелерін бұзу жағдайлары анықталады. Енді «Қорғау – қауіпті жүргізуші» мобильді қосымшасына «Сергек» камералары мен жедел басқару орталығының мәліметтері бірден көрсетілетін болады. Бұл жол ережесін бұзатын көлік жүргізушілерін жылдам анықтауға мүмкіндік береді, – дейді басшы орынбасары Берік Амангелді.
Оның айтуына қарағанда, полиция қызметкерлері планшет арқылы жүргізушінің қозғалысы туралы мәліметті көре алады. Оның ішінде көлікті жалған нөмірмен басқаратын жүргізушілер, техникалық байқаудан өтпеген немесе сақтандыру полисінсіз көлік жүргізгендер, ұстау қажеттілігі туралы ақпарат түскен жүргізушілер, 10 минут ішінде екі немесе одан да көп жол ережесін бұзғандар туралы мәліметтер қамтылады. Жаңа үлгідегі планшеттер патрульдік полиция қызметкерлерінің қызмет кезінде ақпаратты тез табуын арттырады. Көлік жүргізушінің де, полиция қызметкерлерінің де уақытын үнемдеуге септігін тигізеді. Ал айыппұл туралы ақпарат ІІМ деректер базасына жедел түседі. Сондай-ақ бұл бағдарлама хакерлік шабуылдан қорғалған. Планшеттерге мобильді байланыс операторларының бірінің арнайы арнасы арқылы мәліметтер базасымен байланыс орнатылған. Полицейлер бағдарламаға кіріп, хаттаманы жоя алмайды.
Атырау облысы
