Он бір жасқа дейінгі балалар мен жүкті әйелдердің мүддесін қорғайтын заңгерлерлер мен балалардың ата-аналары ұлттық көмір өндіруші және тұтынушы нысандар елде кең таралған климаттық өзгерістерді тоқтатуға құлықты емес және бұл конституцияға қайшы келеді дейді. Мәселен, Сеул тұрғыны, өтініш беруші Ли Донг Хен: «Мен 6 жасар баламның қазіргі климаттық дағдарыс пен табиғи апатта өмір сүруге мәжбүр болғаны үшін өкінемін», дейді.
Бұл мәселе 2019 жылы Нидерландтағы атышулы сот ісінен кейін әлемде белең алды, онда үгітшілер үкіметке ауаға таралатын зиянды қалдықтарды азайтуды бұйырған еді. Бұл «Ирландиядан Үндістанға дейін бүкіл әлемде климаттық даулардың өршуіне себеп болды», дейді экология сарапшылары.
Корей азаматтары климаттың өзгеруіне байланысты мемлекетті сотқа берді. Бір топ жастың жасаған өтініші 2021 жылы Оңтүстік Корея үкіметі нөлдік шығарындылар туралы жаңа заң қабылдағаннан кейін жаңартылды, алайда олар әлі де бұл әрекет жеткіліксіз деп санайды. Олар елдің 2030 жылға қарай парниктік газдар шығарындыларын 40%-ға қысқарту мақсаты конституцияға қайшы және болашақ ұрпақтың негізгі құқықтарына (өмір сүру, теңдік, меншік құқығы және саламатты және таза, жасылданған ортада өмір сүру құқығы) кепілдік бере алмайтынын айтады.
Оңтүстік Кореядағы климаттық өзгерістер күннен күнге күрделеніп барады. Үкіметтің келтірген статистикасы 1985 жылдан бері табиғи апаттардан келген залалдың артқанын, соның салдарынан 2007-2016 жылдар аралығында 162 адам қайтыс болғанын және шығын 7,3 триллион вонға (4,6 миллиард фунт стерлинг) жеткенін көрсетеді. Болжамдық мәліметтерге қарағанда, елде алдағы уақытта жиі және қатты су тасқыны мен орман апаттары болып, фауна тіршілік ету ортасын жоғалтады, күріш секілді негізгі азық-түлік өнімдерінің шығымдылығы мен сапасының төмендеуі орын алады. «Ересектер жерді біз үшін қорғаймыз дейді, бірақ бұл біздің болашағымызға көп қатысы жоқ сияқты», дейді елдің 10 жасар тұрғыны Хан Джэ Ах. «Лас климатты біздерге «табыстамай», ересектер көміртегі қышқылының ауаға бөлінуін дәл қазір қысқартулары керек», деп қосты ол сот процесі кезінде. Көптеген жас сотта климаттық дағдарыс олардың негізгі құқықтарын бұзатынын айтқан. Бірақ жастар бір жағынан тәжірибе көрсеткендей, «Аустралиялық жасөспірім Анджали Шарма сияқты танымал істер сәтсіз аяқталады», деп алаңдайды. Дегенмен судьялар «заң қазіргі күйінде болашақ ұрпақтың бостандықтарына қауіп төндіреді» деп шешім шығарған соң Германия климаттық мәселелерді алға қойған. Корей жастары да өтініштері оң шешім табатынына үмітпен қарап отыр.
Жастар бұл мәселені әлем елдерінің тәжірибесіне сүйене отырып қозғағандарын айтады. Мысалы, Оңтүстік Америка соттары дәл осы мәселеге қатысты «жанашырлық» танытқан. Шешімді орындау қиын болса да 2018 жылы Колумбияның Жоғарғы соты «Амазонкадағы ормандарды кесу қазіргі және болашақ ұрпақтардың барлық колумбиялықтарға қатты зиянын тигізді және негізгі құқықтарды қорғау әлі туылмаған балаларға қатысты» деп шешім қабылдаған болатын. Жаңа істі жүргізіп жатқан Sunflower антиядролық заң тобының президенті Ким Ён Хи The Guardian басылымына: «Талапкердің өкілі ретінде жастар тағайындалды. Өйткені олар болашақ үшін ең маңызды символ болып табылады», деді. Ким осыған дейінгі іс бойынша жүкті әйелдер мен балалардың конституциялық өтініш беру қабілетін мойындайтын шешімге тоқталды және Кореяның Жоғарғы соты ұрпақтар арасындағы негізгі құқықтарға кепілдік беру керек екенін бұрыннан мойындағанын алға тартты.
Бұған дейін бірқатар Батыс елінің тұрғындары үкіметтерін климаттың өзгеруіне кінәлі екенін айтқан болатын. Енді қатарға Азия елдері де қосылды, олар ауаны ластап жатқан өнеркәсіптердің, ірі өндіріс орындарының «өнім өндірудегі» зиянды тұстарына жергілікті билік қана кінәлі деп санайды.
