«Жасыл экономикаға» жәрдемдеседі

«Жасыл экономика» қағидаттарын және ресурс үнемдеу технологияларын енгізу кезінде Қазақстанға Азия даму банкі жәрдемдеседі. Қазақстан мен АДБ ара­сын­дағы 2012-2016 жылдарға ар­налған әріптестік стратегиясында көрсетілгендей, қазіргі уақытта банк Қарағанды қаласының орта­лықтандырылған жылу желілерін оңалтуға қатысты дайындық жұ­мыстарына техникалық көмек көрсетуде. Аталған жоба «Қазақстан Рес­публикасының энергия тиім­ділігін арттырудың 2012-2015 жылдарға арналған кешен­ді жоспарын» орындауға сеп­ті­гін тигізеді, «2010-2014 жылдарға арналған үдемелі ин­дустриялық-инновациялық даму бағдарламасымен» үндеседі, сон­дай-ақ, Үкіметтің энергия тұты­нуды және отын ресурстарын тиім­сіз пайдалануды төмендету мақ­сатына жетуге мүмкіндік бе­реді. Жобаның негізгі мақсаты – SCADA жүйесін енгізу, бақы­лау және есепке алу жүйесін жа­ңалау, транзиттік, жер асты, жер үсті желілерін қосқанда 127 шақырым құбырларды ауыстыру, 7 насос стансасын жаңарту, сондай-ақ, қаржылық менеджмент, сатып алу, әлеуметтік қорғау, қаржыландыруға қол жеткізу сынды басқа да шаралар бойынша кәсібилікті арттыру болып табылады. Сондықтан, Азия даму банкінің бұл жобаға қатысуы кездейсоқ емес. Табиғи ресурстардың азаюы, қоршаған ортаның ластануы, энергия тиім­ділігінің төмендігі тікелей са­паға әсер ететінін ескерсек, банк­тің стратегиялық мақсаты – ке­дейлікті азайтып, өмір сапасын арттыруға бағытталған. Сонымен қатар, Азия даму банкі мемлекет-жекеменшік әріп­тестігі негізінде қалалық инфра­құрылымдар мен табиғи монополия саласына қатысты жобаларды жүзеге асыруда мол тәжірибе жинақтаған. Осы бай тәжірибені Қазақ­станның аталған салаға жеке инвестиция тарту үшін пайдалану мүмкіндігі зор. Тағы бір атап өтерлігі, экологиялық таза технология, ресурс үнемдеу АДБ қызметінің басым бағыттарының бірі. Осы жолда банк көптеген елдерде түрлі жобаларды қар­жы­ландырып қана қоймай, «жасыл экономика» технологиясы арқылы жарқын үлгі көрсетуде. Мысалы, 2-5 мамырда Астанада жоспарланып отырған АДБ Бас­қарушылар кеңесінің 47-ші мәжілісінде «жасыл экономика» қағидаттары қолданылады. Бұл дегеніміз, экологиялық таза өнімдер пайдалану, «жасыл шаралар» өткізу, түрлі ресурстарды пайдалануды азайту. «Егемен ақпарат».