ESG клубының мүшелері тұрақты даму мақсаттарына қол жеткізуге, энергия тиімділігін арттыра отырып қоршаған ортаға келер залалды барынша азайтуға, еңбек жағдайларын жақсартуға және адам құқықтарын сақтауға, сондай-ақ ESG саласындағы үздік тәжірибелерді таратуға ықпал етуді көздейді.
ESG клубын құру туралы келісімге қол қою рәсімі Astana Finance Days дәстүрлі қаржы конференциясы аясында өтті. Басқосу барысында конференцияға қатысушылар ESG қағидаттарын енгізуді қолдаудың заманауи трендтерін, сын-тегеуріндері мен шараларын жан-жақты талқылады.
Рейтингтік агенттіктердің әдіснамасына сәйкес компанияның ESG қызметін анықтайтын және экология, әлеуметтік жауапкершілік пен тиімді корпоративтік басқару салаларын қамтитын 70 бөлімі бар. Ал қаржы нарықтарында эмитенттері жеке компаниялар да, мемлекеттер де болып табылатын осы қызметті жақсартуға бағытталған облигациялар шығарылымының өсуі байқалған.
Сондай-ақ конференцияда ESG компанияларының қызметін қаржылық ынталандырудың ықтимал тетіктері туралы сөз болып, әлемдік практикадан мысалдар келтірілді. Атап айтқанда, ESG күн тәртібіне байланысты мәселелерді шешуге бағытталған жобаларды немесе бағдарламаларды жеңілдікпен қаржыландыру арқылы компаниялардың ESG қызметін ынталандыру мүмкіндігі артпақ. Бұл тұста компаниялардың тұрақты даму деңгейін арттыруға ғана емес, ESG бастамаларын іске асыру арқылы өңірлердің экономикалық дамуына ықпал ететін фискалдық ынталандыруды қолдану мүмкіндігі де кеңеймек.
Компания өкілдерінің айтуынша, «Алтыналмас» ESG қағидаларын енгізу бойынша белсенді жұмыс жүргізе отырып, биылғы жылы ESG жоғары рейтингтік бағасын алуға ниетті.
Жаңа ұйымның серіктестері қатарында – «Астана халықаралық қаржы орталығының әкімшілігі» АҚ, «Қазақстан қор биржасы» АҚ, Еуразиялық даму банкі, Green Technology Hub, «Экономикалық зерттеулер институты» АҚ, «ESG Ұлттық тұрақты даму одағы» ЗТБ және Қазақстанның қаржы және өнеркәсіп секторларының басқа да кәсіпорындары бар.
