Қаржы министрлігі Мемлекеттік кірістер комитеті мамандарының хабарлауынша, көлік салығы бойынша қарызға белшесінен батып жүргендердің дені Алматы қаласында. Бұл шаһардағы 88 мың борышкердің мемлекетке қарызы 5,2 млрд теңгеге жеткен. Одан кейінгі орында Алматы облысы тұр. Мұнда 132 мың борышкер бар болса, олардың қарызы 3,9 млрд теңгені құраған.
Салық берешегі жағынан Нұр-Сұлтан мен Шымкент қалаларының тұрғындары да қалыспай тұр. Олардың жалпы борышы – 2,6 млрд теңге, соның ішінде 76 мың борышкердің 1,9 млрд теңге қарызы бар.
Мемлекеттік кірістер комитеті басқарма басшысының орынбасары Айнұр Сартаеваның айтуынша, 2021 жылға көлік құралдарына салық төлеу мерзімі 2022 жылғы 1 сәуірде аяқталған. Ал 2022 жылғы 17 мамырдан бастап салық сомасын уақтылы төлемеген азаматтарға салық берешегін өндіріп алу туралы салық бұйрықтары жолдана бастады. «Салық қарызы төленбеген жағдайда салық бұйрығы табыс етілген күннен кейін 5 жұмыс күні өткен соң құжат жеке сот орындаушыларының өңірлік палатасына мәжбүрлеп орындатуға жіберіледі. Өз кезегінде жеке сот орындаушылары «Атқарушылық iс жүргiзу және сот орындаушыларының мәртебесi туралы» заңға сәйкес банк шоттары мен мүлкіне тыйым салу түрінде мәжбүрлеп өндіріп алу шараларын қолдануға құқы бар. Егер қарыз 40 АЕК-тен асса, азаматқа елден шығуға тыйым салынуы мүмкін. Бұл туралы ақпаратты мына сілтеме арқылы білуге болады https://aisoip.adilet.gov.kz/debtors», дейді А.Сартаева
Қазіргі кез – жазғы демалыс кезеңі. Уақытын қызықты әрі тиімді өткізу үшін кейбіреулер отбастарымен шетелдерде демалғанды жақсы көреді. «Осындай демалыс маусымы кезінде жағымсыз салдарларды болдырмау үшін Комитет салық берешегі болған жағдайда оны уақтылы төлеуге кеңес береді. Салық қарызы туралы мәліметтерд e-Salyq Azamat мобильді қосымшасындағы «Электронды сервистер» бөлімінен көруге болады», дейді мамандар.
