Бағдарламаны жүзеге асырушы Kazakh Tourism ұлттық компаниясының мәліметі бойынша, қазіргі таңда соммасы 5,2 млн теңге болатын 230 баланың билет құнын субсидиялау бойынша 118 өтінім түскен. Бағдарлама аясында сұранысқа ие бағыттар – Түркістан, Алматы және Маңғыстау облыстары. Турлардың орташа бағасы – 320 мың теңге. Ең арзан тур Алматыда 82 мың теңгеге сатылған. Ал қазірше ең қымбат бағыт – Ақтау қаласы болып тұр. Онда тур 1,2 млн теңгеге сатылған.
Сондай-ақ аталған бағдарламаны Қазақстан Республикасының азаматтары ғана пайдалана алады. Бағдарлама талаптары бойынша, кәмелетке толмаған балалар әуе рейсіне тек ата-анасы және өзге де ересек жақын туыстарымен бірге отырғызылады, бағдарлама тек турпакет шеңберіндегі сапарларға ғана жарамды және турпакет ішкі туризмде лицензиясы бар туроператордан сатып алынуға тиіс. Аталған ережелер сақталған жағдайда, туристік жолдаманы сатып алу кезінде балалардың әуе билетінің құны алынып тасталады. Бағдарлама аясында туроператорлардың шығындары мемлекет есебінен өтеледі.
Саяхат бағытында қызмет көрсететін компаниялар туристердің демалу мерзімі аяқталғаннан кейін Kazakh Tourism ҰК-на құжаттар әзірлеп, субсидиялау бойынша өтінім беруге тиіс. «Белгіленген құжаттар топтамасы толық болса, ұйым 10 жұмыс күні ішінде субсидия төлеу немесе субсидия төлеуден бас тарту туралы шешім қабылдайды. Кейін 45 жұмыс күні ішінде субсидия сомасы туроператордың көрсетілген шотына аударылады», деп көрсетілген ұлттық компанияның хабарламасында.
