D тобында Сирия, Бахрейн және Иран құрамаларымен сынға түскен Олег Киселев шәкірттері алты матчтың бесеуінде жеңіске жетіп, тек соңғы турда Бахрейнге есе жіберді. Елордадағы «Сарыарқа» велотрегінде өткен ойында қонақтар 62:51 есебімен басым түсті. Қазақстан құрамасы соңғы турда жеңілгеніне қарамастан өз тобында 1-орын алып, іріктеудің 2-айналымына жолдама алды. Әлем кубогының екінші іріктеу кезеңінде қазақстандық баскетболшылар Бахрейн, Иран, Аустралия, Қытай және Жапония құрамасымен жолдаманы сарапқа салады. Алғашқы үш орындағы құрамалар Әлем кубогына қатысады. Іріктеу ойындары тамыз, қараша және 2023 жылдың ақпанында өтеді деп жоспарланған.
Айта кетейік, баскетболдан 2023 жылғы Әлем кубогы 25 тамыз бен 10 қыркүйек аралығында бірден 3 мемлекетте – Индонезия, Жапония және Филиппинде ұйымдастырылады. Қазақстан құрамасы 2019 жылғы Әлем кубогының екінші іріктеу кезеңіне өткенімен, финалдық сайысқа жолдама ала алмаған еді.
