Клубтың баспасөз қызметі таратқан мәлімет бойынша, елорда клубы 2011 жылы Уфаның «Салават Юлаев» клубы сапында Гагарин кубогында топ жарған ресейлік қорғаушы Михаил Григорьевті өз қатарына қосып алды. 1991 жылы Ресейдің Түмен қаласында дүниеге келген хоккейші 2012/13 жылғы ҚХЛ маусымында «Барыс» клубында ойнаған. Клуб пен ойыншы арасындағы келісімшарт бойынша, 31 жастағы тәжірибелі қорғаушы елордалық команда сапында келесі жылдың 30 сәуіріне дейін өнер көрсетеді.
Михаил Григорьев әр жылдары ҚХЛ-да бақ сынайтын «Авангард», «Спартак», «Динамо» клубтары жейдесінде мұзайдынға шыққан. Ал кейінгі маусымда ол Магнитогорскінің «Металлургында» ойнап, Гагарин кубогының финалына дейін жетті. Бір маусымда ол 24 ойын өткізіп, екі мәрте әріптестеріне нәтижелі пас асырған.
