Ұлыбритания ашық чемпионатының 17-ракеткасы болып тіркелген Елена Рыбакина төртінші айналымда дүниежүзілік рейтингте 80-орында тұрған хорватиялық Петра Мартичпен шеберлік байқасты. Бір жарым сағатқа жалғасқан бәсекеде отандасымыз екі сетте – 7:5, 6:3 есебімен жеңіске жетті. Осылайша, Елена Рыбакина өз карьерасында тұңғыш рет «Уимблдон» жарысының ширек финалына жолдама алды. Ол былтырғы бәсекеде төртінші кезеңде жеңілген еді. Енді, міне, араға жыл салып өз нәтижесін жаңартып қана қоймай, тарихи жетістікке қол жеткізді. Жерлесіміз жартылай финалға шығу үшін әлемнің 44-ракеткасы аустралиялық Айла Томляновичпен кездеседі. Томлянович төртінші айналымда франциялық Ализе Корнеден (37) басым түскен болатын. Ал А.Корне екінші кезеңде біздің Ю.Путинцеваны, ал үшінші кезеңде әлемнің бірінші ракеткасы польшалық Ига Швентекті жарыс жолынан шығарып жіберген еді.
Елена Рыбакина «Үлкен дулыға» санатына енетін жарыстарда бірінші рет ширек финалға шығып тұрған жоқ. Ол бұған дейін былтырғы «Ролан Гаррос» турнирінің де ширек финалында ойнаған болатын.
Елена Рыбакина мен Айла Томлянович арасындағы кездесу бүгін өтеді.
