Аса бай алтын бұйымдармен көмкерілген сармат ханшайымының салтанатты түр-тұлғасын белгілі реставратор Қырым Алтынбеков қалпына келтіріп, елордадағы Ұлттық музей мен Орал облыстық тарихи-өлкетану музейіне сыйға тартқан еді. Енді, міне, Тақсай ханшайымының тағы бір көшірмесі қасиетті Түркістан төрінен орын алды. Қазақстан Республикасы Премьер-Министрінің орынбасары Ералы Тоғжановтың төрағалығымен Батыс Қазақстан облысы әкімдігі Тақсай ханшайымының көшірмесін дайындап, Түркістан облыстық «Ұлы дала елі» орталығына сыйға тартты. Тамаша тарту Батыс Қазақстан облыстық тарихи-өлкетану музейінің ұйымдастыруымен өткен «Тарихы – терең Ақжайық, Тақсай ханшайымы» атты көрменің ашылуы кезінде жасалды.
Айта кетейік, Тақсай ханшайымы – Қазақстанда табылған 4 алтын адамның бірі. Қазақстанның Жалпыұлттық қасиетті нысанына айналған ерекше жәдігерді, Ақ Жайық өңіріндегі музей қоры туындыларын кеңінен насихаттау, рухани құндылықты жаңғыртып, Түркістан қаласының тұрғындары мен қонақтарына мәдени-рухани демалыс сыйлау мақсатында ұйымдастырылған іс-шараға түркістандықтар ерекше риза болды.
Батыс Қазақстан және Түркістан облысы музейлерінің арасындағы ынтымақтастықты арттыру, өзара байланысты нығайтуға ықпал ететін аталған көрменің салтанатты ашылуына Батыс Қазақстан облысы мәдениет басқармасының басшысы Сайран Дүйсенов, Батыс Қазақстан облыстық тарихи өлкетану музейінің директоры Мирболат Ерсаев қатысып сөз сөйледі.
– Тақсай ханшайымы – Батыс Қазақстан өлкесінің бір жауһары еді. Бүгін киелі Түркістан облысына жаңа көшірмені тапсырып отырмыз. Алтын ханшайымды көзімен көріп, тамашалау бақыты елімізде үш-ақ қала тұрғындарына бұйырған. Болашақта қос облыстың музейлері арасындағы ынтымақтастық бұдан да арта беретініне сенемін. Жас ұрпаққа мақтан етерлік жақсы жәдігеріміз көбейе бергей, – дейді Сайран Темірғалиұлы.
Батыс Қазақстан облысы
