Жас теннисшілер Еуропада үздік шықты

Мәселен, Францияның астанасы – Париж қаласында ұйым­дастырылған 14 жасқа дейінгілер арасында Tennis Europe сериясы бойынша бірінші санаттағы турнирде қазақстандық Заңғар Нұрланұлы финалда өнер көрсетті. Қазақстан теннис феде­рациясының мәліметі бойын­ша, айтулы додаға әлемнің 30 елінен 160-тан астам жас ойыншысы қатысқан. Олардың арасында қазақстандықтардан жарыстың бірінші ракеткасы Заңғар Нұрланұлынан бөлек, Даниэль Тазабеков, Дамир Жал­ғасбай, Сәтима Төреген және Ариана Гогулина бар. Заң­ғар Нұрланұлы финалдағы тарты­с­ты матчта германиялық Нильс Макдональдпен шеберлік бай­қасып, екі сетте – 6:7 (4:7), 4:6 есе­бімен қарсыласына жол берді.

Заңғар финалға барар жолда алдымен франциялық Ариан Калитера мен Кипрен Шивалирді тізе бүктірді. Сосын италиялық Рафаэль Чиуэрнеллиді жолдан тайдырды. Ширек финалда мысырлық Эяд Мохаммед Шерифтан айласын асырды – 7:6 (7:3), 6:2. Жартылай финалда жарыстың 4-ракеткасы франциялық Тимео Труфеллиді ойсырата жеңді – 6:1, 6:2. Бұл турнирдің ерекшелігі, мұндағы бәсекелер атақты Roland Garros корттарында өтеді. Кезінде мұнда әр жылдары жасөспірім шағында Рафаэль Надаль, Гаэль Монфис, Стефанос Циципас, Карлос Алькарас және басқалар жеңімпаз атанған болатын.

Сонымен қатар Қырғыз­станның Чолпон-Ата қаласында ITF Juniors сериясы бойынша өткен бесінші санаттағы турнирде қарағандылық Виталий Зацепин тамаша өнер көрсетті. Ол финалда корт иесі Ильгиз Камчибековті ұтты – 6:3, 6:1. Жұптық сында В.Зацепин Жакас Козбакпен бірге қазақ­стан­дықтар Олег Гусаков – Дархан Жақангерге жол берді – 7:6 (7:1), 1:6, 4:6. Осында жұптық сында Анастасия Крымкова чемпион атанды. Ол қырғызстандық Владислава Андреевскаямен бірге Қарақат Қойлыбаева – Дарья Шубинаны бас жүлдесіз қалдырды – 6:1, 6:2.

Грузияда 18 жасқа дейінгі­лер арасында төртінші санат­тағы ITF жарысында алматы­лық Іңкәр Дүйсебай финалға дейін жетті. Соңғы бәсекеде Іңкәр ұлы­бри­та­ния­лық Габи Пас­каускаспен бірге түр­кия­лықтар Ирем Кюрт – Дуру Сокеге есе жіберді – 6:1, 5:7, 11:13. Же­келей сында Іңкәр Дүйсе­бай жартылай финалда Натали Джаниден ұтылды – 3:6, 6:2, 5:7.

Тағы бір алматылық Роберт Каминский Германияда 12 жас­қа дейінгілер арасында бірінші санат­тағы Tennis Europe додасын­да жұптық сында озық шық­ты. Жекелей сында ол жар­ты­лай финалда ресейлік Алек­сандр Куницыннан жеңілді – 3:6, 3:6.