Денсаулық сақтау министрлігінің мәліметінше, қазіргі уақытта елімізде 149 жылжымалы медициналық кешен мамандардың қызметтерін және кең бейінді диагностикалық қызметтерді ұсынады. 2022 жылдың жарты жылында ЖМК қызметімен 1530 елді мекен қамтылды және 822 325 ауыл тұрғынына қызмет көрсетілді.
«358 181 диагностикалық зерттеу, 222 485 зертханалық зерттеу, 787 292 бейінді мамандардың консультациясы жүргізілді, 50 689 науқас анықталды, оның ішінде 12 883 адам есепке алынды. Сондай-ақ, шалғай елді мекендердің тұрғындары медициналық пойыздардан медициналық тексеру мен диагностика алады», деп жазды ведомстводан.
Естеріңізге сала кетейік, медициналық пойыздар жобасы Денсаулық сақтау министрлігінің қолдауымен «Samruk-Kazyna Trust» әлеуметтік жобаларды дамыту қоры «Самұрық-Қазына» АҚ компаниялар тобының атынан «Қазақстан Теміржолы» ҰК АҚ жанындағы «Әлеуметтік жобалар қоры» Корпоративтік қорымен бірлесіп жүзеге асырылуда. 23 мамырдан бастап «Жәрдем» медициналық пойызы жоспарланған 79 станцияға барды, 8036 тұрғын, 3255 бала тексерілді. Дәрігерлік қабылдау - 34 911, шағын хирургиялық операциялар - 138. Өз кезегінде «Салауатты Қазақстан» медициналық пойызы жоспарланған 68 станцияға барды, 1781 тұрғын, 246 бала тексерілді.
Дәрігерлік қабылдау - 1781, шағын хирургиялық операциялар - 195. Жалпы, медициналық поездар 366 мыңнан астам адамды медициналық қызметтермен қамтиды, ал дәрігерге келушілердің саны 100 000-ды құрайды деп жоспарлануда. Сонымен қатар, ауыл тұрғындары үшін ауруларды анықтауға арналған кәсіби тексерулердің тізбесі кеңейтілді. Тиісті бұйрықты Денсаулық сақтау министрлігі бекітті.
«Осылайша, ауыл тұрғындарын профилактикалық тексеруді жүргізу үшін 18 жастан 29 жасқа дейінгі жаңа нысаналы топты анықтау есебінен жүрек-қантамыр жүйесі, қант диабеті, асқазан мен бүйректің созылмалы ауруларын ерте сатысында анықтау мақсатында халықты қамтуды ұлғайту көзделген. Сондай-ақ, ауыл тұрғындарына асқазан-ішек жолы, зәр шығару жүйесі, ересек жастағы топтағы туберкулез және қуықасты безі обырын ерте анықтау қызметтері кеңейтілді», делінген министрліктің ақпаратында.
