– Қазір шаруашылыққа келтірілген шығынның көлемі анықталып жатыр. Бірақ аталған серіктестік басшылары төрт түлік малды сақтандырмаған. Сол себептен кәсіпкерге мемлекет тарапынан өтемақы төленбейді, – дейді Азамат Айтқалиев.
Оның дерегіне қарағанда, өртенген қойдың 500-ден астамы көршілес Батыс Қазақстан облысының Жаңақала ауданында орналасқан ет комбинатына жіберілген. Термиялық өңдеуден өткен соң одан ет өнімдерін дайындау көзделген.
Құрманғазы ауданы әкімдігінің баспасөз қызметінен мәлім еткендей, дала өрті Жалғызапан ауылына таяу орналасқан Асқар, Бесоба, Апандыкөл қыстақтарының аумағына жайылған. Өртті сөндіруге Сүйіндік ауылдық округінің 30 тұрғыны, Азғыр аймағында геологиялық барлау жұмыстарын жүргізіп жатқан «ТАТ Арка» ЖШ тарапынан 10 техника тартылған. Ауылдық округ әкімі Қанат Құлшаровтың айтуынша, соңғы аптада үш өрт тіркелген. Ал серіктестік басшылары тарапынан мал шығыны жөнінде тиісті органдарға шағым түспеген.
– Сүйіндік ауылында өрт сөндіру қызметінің арнайы жасағы жоқ. Ауыл мен аудан орталығының арақашықтығы – 270 шақырым. Өрттің болғаны туралы облыстық төтенше жағдайлар департаментіне хабарланбады. Батыс Қазақстан облысында басталған өрттің көршілес Астрахан облысына дейін жалғасқаны белгілі болды. Кейін өрт Атырау облысының аумағына өткен. Жалын шарпыған жердің жалпы аумағы – 100 гектар, – деп мәлім етті облыстық төтенше жағдайлар департаментінің мемлекеттік өрт бақылау басқармасы бастығының міндетін атқарушы Дәурен Берденов.
Атырау облысы
