Загребтегі дода – 2024 жылы Парижде ұйымдастырылатын Олимпия ойындарына рейтингтік ұпай беретін үшінші Grand Slam жарысы. Өткен айдың соңында Моңғолияның Ұлан-Батыр қаласында ұйымдастырылған алғашқы «Үлкен дулыға» санатындағы жарыста қазақстандық дзюдошылар төрт қола медаль олжалаған болса, Будапештегі екінші турнирде үздіктер қатарынан көріне алмағанын жоғарыда айттық. Енді, міне, ер кезегі үшке дейін дегендей, Олимпиадаға ұпай үлестірілетін үшінші Grand Slam жарысында қазақстандық балуандар алғашқы алтын медаліне қол жеткізді.
Жастар арасындағы 2015 жылғы әлем чемпионы, биылғы ақпанда Израильдің Тель-Авив қаласында өткен жарыста қола жүлде алған Мағжан Шамшадин (60 кг) Хорватиядағы бәсекеде барлық қарсыласын қапы қалдырып, Загреб төрінде Қазақстанның Әнұранын шырқатты.
Хорватия татамиіндегі жарыстың алғашқы айналымдарында отандасымыз 22 жастағы кубалық Данни Порте Вальдивиезо, 28 жастағы америкалық Давид Терао мен 20 жастағы испаниялық Джауме Рико Бэрнабеуді жарыс жолынан ығыстырса, ширек финалда түрікменстандық Хакберді Жумаевты жеңді. Жартылай финалда оның жолы жастар және ересектер арасындағы Еуропа ойындарының жеңімпазы франциялық тәжірибелі балуан Максим Мерлинмен қиысты. Еуропалық жарыстарда жүлде алып жүрген 24 жастағы франциялық балуан Мағжан Шамшадинмен бес жарым минут бойы күресіп, отандасымыздың осал тұсын таба алмады. Ал бас жүлде үшін өткен тартыста қандасымыз әлем және Азия чемпионатының, Азия ойындарының жүлдегері атанып жүрген оңтүстіккореялық Ким Вон Джуннан айласын асырып, алтын жүлдеге ие болды.
60 кило салмақтың қола жүлдесіне былтыр Ақтауда өткен жастар арасындағы әлем чемпионатында алтын алған 19 жастағы грузиялық Гиоргий Сардалашвили мен жастар арасындағы әлем және Азия чемпионаттарының жеңімпазы жапониялық Генки Кога (Жапония) ие болды. Жапониялық балуан қатарынан екінші Grand Slam жарысында қола жүлде жеңіп алып отыр.
Токио Олимпиадасынан кейін 66 килоға ауысқан Елдос Сметовтің әзірше жаңа салмақта жолы болар емес. 60 килода екі мәрте Олимпия ойындарының жүлдегері, әлем чемпионатының алтын жүлдесін жеңіп алған отандасымыз Загребте небәрі жетінші орынға табан тіреді. Алғашқы айналымдарда ол былтырғы Еуропа ойындарының жеңімпазы түркиялық Эйдер Токтайді, жастар арасындағы Еуропа кубогының жеңімпазы израильдік Роналд Коколаев және сербиялық Страхиня Бунчичті жеңгенімен, ширек финалда осы жарыстың болашақ чемпионы әзербайжандық Яшар Наджафовтың осал тұсын таба алмады. Сондай-ақ 100 килода белдескен Нұрлыхан Шархан да ширек финалда сүрінді.
Өзге спортшыларымыздың нәтижесіне тоқталар болсақ, Бекәділ Шаймерденов (81 кг), Ермахан Әнуарбеков пен Ерсұлтан Мұзаппаров (90 кг), бірінші айналымда сүрінсе, Ерлан Серікжанов (73 кг) пен Еламан Ерғалиев екінші айналымнан әріге аса алмады. Ал Нұрдәулет Аманқосов (60 кг), Алмас Ғалымов (66 кг), Абылайхан Жұбаназар (81 кг), Әділ Оразбаев (+100 кг) жарысты үшінші кезеңмен аяқтады.
Әйелдер арасындағы белдесуде ел намысын Ғалия Тыңбаева (48 кг), Салтанат Сұлтанбекова (52 кг), Бақыт Құсақбаева (57 кг) және Аруна Жангелдина (78 кг) қорғап, төртеуі де екінші айналымда сүрінді.
Әлемнің 69 елінен 500-ден аса балуан қатысқан Grand Slam жарысында жалпыкомандалық есепте Жапония мен Нидерланд құрамалары топ жарды. Екі елдің спортшылары Загребте екі алтын, екі қола медаль олжалады. Екінші орынға екі алтын медалі бар Канада құрамасы ие болса, бір алтын, екі күміс және екі қола жүлде алған Грузия спортшылары үшінші орынға табан тіреді. Бір алтыны бар Қазақстан құрамасы 10-орынға тұрақтады.
