Айтпағымыз – турнирдің нәтижесі емес, турнир барысында орын алған келеңсіз оқиға хақында. «Хабиб, Хабиб!» деп құрмет-қошеметпен ұрандатып, чемпионның соңынан дуылдай ерген жастардан Хабибті арнайы топ – достары мен спортшылар және полицейлер оқшаулап келе жатты. Осы кезде топ алдынан жүгіре шыққан азамат қызметін атқарып жүрген полицейді кеудесінен қос қолымен итеріп жіберіп, Хабибті жетелей жөнелді. Әлгі азаматтың қылығы желі қолданушыларының, яғни халықтың сынына ілікті.
Ақтауда орын алған келеңсіз оқиғаға орай заң орындары шара қолданды. Ақтау қаласының әкімшілік құқық бұзушылықтар жөніндегі мамандандырылған сотының баспасөз қызметінің хабарлауынша, азамат Т-ға қатысты ӘҚБтК-нің 434-бабының 1-бөлігінде көзделген әкімшілік құқық бұзушылық туралы іс қаралған. Сотта анықталғандай, «Т. 2022 жылы 17 шілде сағат 01:30 шамасында Ақтау қаласы, 15 «а» шағын ауданында өтіп жатқан спорттық іс-шаралар кезінде, яғни қоғамдық орында айналасындағыларды қасақана сыйламаған.
Сөйтіп, қоғамдық тәртіпті бұзып, тәртіпті сақтауға шақырылған полиция қызметкерлеріне қызметтік міндеттерін атқару кезінде күш қолданып, қоғамдық орында тыйым салу әрекеттеріне бағынбай, күштеп кіріп, ұсақ бұзақылық жасаған» деп танылды.
Сот қаулысымен Т. есімді азамат ӘҚБтК-ң 434-бабының 1-бөлігімен кінәлі деп танылып, оған әкімшілік жаза ретінде 10 тәулікке әкімшілік қамаққа алу жазасы тағайындалған. Себебі Т. бұрын бірнеше рет әкімшілік жауапкершілікке тартылған екен.
Сот қаулысы заңды күшіне енген жоқ, бірақ заңсыздық тасада қалмай заңға сай шара қолданудың қаперге алынғаны дұрыс.
Расында, ерік-жігерін бағындыра алмаған, ісіне есеп бере алмаған жігіттің әрекеті сырт көзге сорақы көрініп-ақ тұрды. Полицейді жеккөрушілік, қызметіне кедергі келтіру дұрыс па? Әрине, тәртіп сақшысы құқын асыра пайдаланса, заңды, тәртіпті бұзса, өз жазасын алуға тиіс. Бірақ көпе-көрнеу оларға қол жұмсауды, басынуды құптай алмаймыз. Тәртіп сақшысы – мемлекеттік қызметкер, оларды негізсіз қорлау – мемлекетті сыйламау болып шықпай ма?
Тәртіп сақшылары ішінде елді қорғау, тұрғындардың қауіпсіздігін қамтамасыз ету барысында кеудесін алдымен оққа тосып, ерліктің үлгісін көрсетіп жүргендері де аз емес. Лаңкестермен күресте, ел басына күн туған ауыр шақтарда оққа ұшқан полицей ерлерімізді қалай ұмытамыз?! Олар «полицей» деген мамандықты меңгеріп, ойнап жүріп опат болған жоқ. Олар – Отан алдындағы азаматтық парызын атқарып, ел мен жердің тыныштығын қорғау жолында жанын қиғандар. Сондықтан тәртіп сақшыларын орынсыз төменшіктетіп, абыройы мен беделін аласарта беруге, жігерін жасыта беруге болмайды.
Жасыратыны жоқ, кәсібін асыра пайдаланатындар қай салада да кездеседі. Пара алатын мұғалім мен дәрігерге, сот пен мемлекеттік қызметшіге, бопсалайтын журналистке бола бүкіл саланы жоққа шығаруға, кездесе қалған мұғалім мен дәрігерді, журналисті итеріп-түйіп қорлауға бола ма?! Өз өмірлерін қатерге тігіп өрт арасынан тұрғындарды құтқарған, қылмыскерді қуып жетіп тұтқындаған, көпірден немесе биіктен секіріп, өмірін қиюға бел байлағандарды құтқарған кезде ғана полицейлер мықты ма?
Сақшы тәртіпті қорғайды, оны кім қорғайды?
Маңғыстау облысы
