Дүниежүзілік ойындарда ел намысын қорғаған 16 спортшымыз нашар нәтиже көрсетті деп айта алмаймыз. АҚШ төріндегі додада Қазақстан қоржынына алтын медальды каратэден Токио Олимпиадасының қола жүлдегері Софья Берульцева салды. Жарыстың екінші күнінде сынға түскен отандасымыз өз салмағында қарсылас шақ келтірген жоқ. Ал джиу-джитсудың неваза түрінен сынға түскен Галина Дуванова мен муай-тайдан 2 дүркін әлем чемпионы Алмаз Сәрсембеков финалда сүрініп, жарыстың күміс жүлдегерлері атанды. Сондай-ақ спорттық акробатикадан Даниэль Диль мен Вадим Шуляр жұбы үздік үштікті түйіндеді.
Спортты дамыту дирекциясының дерегі бойынша, Қазақстан құрамасы Дүниежүзілік ойындарға 1993 жылдан бері қатыса бастаған. Сол жылы Нидерланд Корольдігінің Гаага қаласында өткен додада жерлестеріміз спорттың 20 түрінен бақ сынап, 1 алтын, 1 күміс пен 1 қола медаль жеңіп алды. Ал ең кейінгі рет 2017 жылы Вроцлав қаласында (Польша) өткен ойындарда өнер көрсетіп, жерлестеріміз 27 спорт түрінен 1 алтын, 5 күміс және 2 қола медаль еншілеген еді. Бирмингем ойындары жүлде саны мен сапасы жағынан 2-орынға шықты.
Естеріңізге сала кетейік, Бирмингемде әлемнің әр елінен келген 3500-ден астам атлет 34 спорт түрінен 223 медаль жиынтығын сарапқа салды. Соның ішінде Қазақстандық спортшылар 8 спорт түрі – кикбоксинг, садақ ату, муай-тай, джиу-джитсу, спорттық акробатика, брейкинг, WKF каратэден жүлдеге таласты.
Дүниежүзілік ойындар 1981 жылдан бастап әр 4 жылда бір рет, Олимпия ойындарынан кейінгі жылы ұйымдастырылады. Дүниежүзілік ойындар 2001 жылдан бастап Халықаралық Олимпиада комитетінің қол астына көшті. Әуелі тек Олимпиада бағдарламасына кірмейтін спорт түрлерінен өткізілсе, бертін келе 4 жылдықтың басты бәсекесіндегі спорт түрлері қосылды. Мәселен, Бирмингемде көркем гимнастика, садақ ату, құзға өрмелеу сынды олимпиадалық спорт түрлерінен жүлделер сарапқа салынады. Ал Дүниежүзілік ойындарда лакросс, каноэ-марафон, дрон жарыстыру, кикбоксинг, брейк-данс, паркур мен арқан тартыс секілді спорт түрлерінен алғаш рет жарыс өтеді.
