2022 жылғы маусымның соңындағы жағдай бойынша, АІХ-тің ресми тізіміне әртүрлі 87 эмитенттің 131 бағалы қағаздар шығарылымы, оның ішінде 19 ETN (Exchange traded notes) кірді. 17 қазақстандық және 12 халықаралық брокер АІХ-тің сауда мүшелері болып саналады. АІХ Орталық депозитарийінде инвесторлардың 344 мыңнан астам шоты ашылды.
Мамырдың соңында АІХ-те үлестік құралдар листингі бар компаниялардың («Қазатомөнеркәсіп», Polymetal, «Халық банк», Ferro-Alloy Resources Limited, «ЦентрКредит банкі», Kaspi.kz) жалпы нарықтық капиталдандыруы 20,4 млрд доллардан асып отыр. Маусымда АІХ-тің ресми тізімі «Қазақстанның Халық Банкі» АҚ-ның 100 млн долларының купондық мөлшерлемесі жылдық 2,5 пайызды құрайтын үш жылдық облигацияларының листингімен толықты. Қазақстанның аса ірі банкінің бұл облигациялар шығарылымы 500 млн доллар көлеміндегі облигациялық бағдарламасын іске қосу шеңберінде өтті. 30 маусымда Finbox микроқаржы ұйымы 3 млн доллар көлемінде долларлық облигацияларын шығарды.
Биржалық өнімдер желісін кеңейту бойынша жұмыс жалғастырылуда. Осы жылғы маусымда екі биржалық нота (ETN) – iX Islamic Exchange Traded Notes және iX China Equities BR іске қосылды.
Сонымен қатар маусымда АІХ жаңа құрал – Коммерциялық қағаздарды іске қосты. Бұл – өздерінің қысқа мерзімді айналым капиталына қажеттіліктерін қаржыландыру үшін расталған кредитке қабілеті бар компаниялар шығаратын қамтамасыз етілмеген қысқа мерзімді міндеттемелердің кең таралған түрі.
Қазақстанның қор нарығы айтарлықтай құбылмалы нәтижелер көрсетуде. Маусымның нәтижелері бойынша, AIXQI индексі 1,41 пайызға, 754.22 пункттен 764.87 пунктке дейін өсті. Индекске қарайтын 8 компанияның төртеуі айды жасыл аймақта аяқтады. Олардың үшеуі екі мәндік өсу көрсеткіштерін көрсетті.
«Халық банк» акциялары жақсы өсім көрсетті (+17,01 пайыз). Қазақстанның аса ірі банкі 2022 жылдың І тоқсаны бойынша есебін жариялады. Оның нәтижесі бойынша банктің таза пайдасы өткен жылдың сәйкес кезеңімен салыстырғанда 96,8 млрд теңгеден 124,2 млрд теңгеге дейін өсті. «ЦентрКредит банкі» де жақсы нәтижелер көрсетті. Ол І тоқсанның қорытындысы бойынша, өзінің таза пайдасын бір жыл бұрынғы деңгеймен салыстырғанда 74,7 млрд теңгеден 102,7 млрд теңгеге дейін арттырды. Бұл «ЦентрКредит банкі» акцияларының баға белгілеулерінің өсуіне әкелді (+14,73 пайыз).
«Қазақтелеком» қызметінің жақсы нәтижелері Kcell-дің алдыңғы айдағы құлдырауының есесін қайтарды (маусымда +11,05 пайыз). Бірақ негізгі компанияның акциялары айдың қорытындысы бойынша төмендеді (-6,25 пайыз). Уран фьючерстеріне қатысты бағаның оң динамикасы «Қазатомөнеркәсіп» акцияларының өсуіне ықпал етті (+2,44 пайыз). Kaspi.kz акцияларының құны, компанияның таза пайдасы 2021 жылдың І тоқсанындағы 74,7 млрд теңгеден 2022 жылдың ІІ тоқсанында 102,7 млрд теңгеге дейін өскеніне қарамастан, төмендеді (-4,53 пайыз). S&P Global Ratings рейтинг агенттігі Kaspi Bank-тің ұзақ мерзімді және қысқа мерзімді кредиттік рейтингтерін «ВВ-/В» деңгейінде растады.
Компания шығарған есептілік инвесторлар үшін нанымсыз болып шыққандықтан, маусымда KazTransOil акциялары өз құнының -6,16 пайызын жоғалтты. Таза пайда 2021 жылдың І тоқсанындағы 16,7 млрд теңгеден 2022 жылы 10,2 млрд теңгеге дейін төмендеді. Fitch Ratings рейтинг агенттігі KazTransOil дефолтының шетелдік валютадағы ұзақ мерзімді рейтингін «Тұрақты» болжамымен «ВВВ-» деңгейінде растады. Central Asia Metals акциялары мыс, қорғасын және мырыш бағалары төмендеуінің жалғасуы жағдайында және Ұлыбритания инвесторларының рецессиялық күтулерімен байланысты маусымның қорытындысы бойынша төмендеді (-8,40 пайыз).
